Սպառնալիքի լեզուն չի աշխատելու բանակցային գործընթացում: Այս մասին այսօր՝ մայիսի 4-ին, Ազգային Ժողովում լրագրողների հետ ճեպազրույցում ասաց ՀՀ արտաքին գործերի նախարար Զոհրաբ Մնացականյանը՝ անդրադառնալով Ադրբեջանի պաշտպանության նախարար Զաքիր Հասանովի հայտարարությանը, թե Ադրբեջանը պատրաստ է լայնածավալ ռազմական գործողությունների եւ հնարավոր է սրացումներ լինեն: Հարցիին, թե հնարավո՞ր է հայկական կողմին Արցախի հիմնահարցում ինչ-որ բան պարտադրեն, եւ արդյոք Հայաստանն ունի այնքան ներուժ եւ վճռականություն, որ կարողանա դիմակայել այդ ճնշումներին, ԱԳ նախարարն արձագանքեց. «Ես որպես կառավարության անդամ, ինձ տրված է մանդատ առաջ տանելու այդ աշխատանքը, մեր կառավարության ղեկավարը վարչապետն է, որն ունի մանդատ ժողովրդի կողմից, եւ սրանով ենք մենք առաջին հերթին առաջնորդվում, երբ ներգրավվում ենք  բանակցություններում: Մենք չենք կարող ստեղծել իրավիճակ, երբ մեր ժողովրդի համար անվտանգային համակարգը դառնում է խոցելի, եւ այդ առումով շարունակելու ենք: Մեր աշխատանքային մեթոդը կառուցողական է, եւ այդ մեթոդով մենք շարունակում ենք, բայց կառուցողական չի նշանակում, որ մենք կարող ենք աշխատել մի իրավիճակում, երբ մեր ազգային շահերի համար ստեղծվում է վտանգ, ստեղծվում է անընդունելի իրավիճակ»: