Արժանապատվության կարեւորությունը եւ արժանապատվության իրավունքի պաշտպանության անհրաժեշտությունը չտեսնող պետությունները եւ հասարակությունները ատելության եւ բռնությունների (նաեւ դրանցից բխող բացասական երեւույթների) պակաս չեն ունենալու: Այս մասին ֆեյսբուքյան իր էջում գրել է ՓՊ նախագահ Արա Զոհրաբյանը։ Նա, մասնավորապես, գրել է. «ՄԱՐԴՈՒ ԱՐԺԱՆԱՊԱՏՎՈՒԹՅՈՒՆՆ ԱՆԽԱԽՏԵԼԻ Է Մարդու իրավունքների համընդհանուր հռչակագիրը (1948 թվական) ընդունվել եւ հռչակվել է նկատի առնելով, որ մարդկության ընտանիքի բոլոր անդամներին հատուկ ԱՐԺԱՆԱՊԱՏՎՈՒԹՅԱՆ եւ նրանց հավասար ու անկապտելի իրավունքների ճանաչումը հանդիսանում է ազատության, արդարության եւ համընդհանուր խաղաղության հիմքը: Հռչակագիրը շեշտում է մարդկային արժանապատվության ժառանգական անգնահատելի արժեքը, որը պետք է ճանաչվի բոլոր մարդկանց համար: Պատահական չէ, որ ՀՀ Սահմանադրությունը մարդու անօտարելի արժանապատվությունն է համարում իրավունքների եւ ազատությունների անքակտելի հիմքը: Մարդու արժանապատվության իրավունքը բացարձակ եւ անսահմանափակելի իրավունք է: Վերջին իրադարձությունները (վիրավորանքներ, բռնություններ) ցույց տվեցին, որ մենք կործանման ճանապարհով ենք գնում: Դեռեւս 2018թ. օգոստոսի 20-ին ֆեյսբուքյան էջում նշել էի՝ «Այս փուլում, կարծում եմ պետք է փորձել վերացնել Նիկոլ Փաշինյանի համակիրների (մեծ մասը կեղծ օգտատերերի) հայհոյանքների եւ վիրավորանքների դրվածքը այլ կարծիք ունեցողների հասցեին: Տիեզերական փոխադարձության օրենքի համաձայն, ամեն ինչ վերադառնում է: Նախորդ իշխանությունը հնձեց իր ցանածը, իսկ այսօրվա իշխանությունը վաղը հնձելու է իր այսօրվա ցանածը: Այդ իսկ պատճառով ավելի լավ է հայհոյանքի փոխարեն սեր ցանել, իսկ վիրավորանքի փոխարեն՝ համերաշխություն:»: 2020 թվականն է: Հայհոյանքները եւ վիրավորանքները դարձել են փոխադարձ, իսկ մթնոլորտը՝ շիկացած: Ցավոք, պետության կողմից բավարար միջոցներ չեն ձեռնարկվում վերացնելու համար երկկողմանի անհանդուրժողականությունը, որը հիմնականում դրսեւորվում է ատելության խոսքի եւ հայհոյանքի ձեւերով: Արժանապատվության կարեւորությունը եւ արժանապատվության իրավունքի պաշտպանության անհրաժեշտությունը չտեսնող պետությունները եւ հասարակությունները ատելության եւ բռնությունների (նաեւ դրանցից բխող բացասական երեւույթների) պակաս չեն ունենալու: Դեռ ուշ չէ»։