Աշխարհում կորոնավիրուսի բռնկման ֆոնին շատ երկրներ խստացրել են փողոցների մաքրման սանիտարահիգիենիկ պահանջները, պարբերաբար լվանում եւ ախտահանում են մայթերը, բակերն ու մուտքերը:
Հայաստանում եւս համապատասխան որոշումներ, կարգադրություններ են ընդունվել, հրահանգներ են տրվել: Սակայն շատ հաճախ ստիպված ենք արձանագրել սոսկալի կերպով չհետեւելը ոչ միայն այս պայմաններում ընդունված որոշումներին, ալեւ` հիգիենայի տարրական կանոններին:
Եթե աղբի եւ ախտահանման հետ կապված իրավիճակը կենտրոնական փողոցներին քիչ թե շատ լուծված է, ապա շատ բակերում իրավիճակը շարունակում է ծայրաստիճան ծանր մնալ: Աղբը` կենցաղային եւ շինարարական, եւ նույնիսկ մահացած կենդանիները մնում են օրերով եւ շաբաթներով: Եթե աղբի խողովակները մաքրվում են, ապա պատշգամբների տակի, առջեւի պարտեզների, պարսպապատված (մեծ մասամբ` առանց որեւէ թույլտվության) հողամասերի, նկուղային տարածքները իրավասու կառույցների ուշադրությունից դուրս են մնում: Կորոնավիրուսի հետ կապված բարձր վտանգի պայմաններում իրավիճակը սպառնալից երանգներ է ստանում:
