Կառավարությունում վերջերս պաշտոնանկ արված Տեսչական մարմինների աշխատանքները համակարգող գրասենյակի ղեկավար Հայկ Այվազյանը համալրել է Ազգային ժողովի անկախ պատգամավոր Արման Բաբաջանյանի համակիրների շարքերը եւ լծվել է «Այո»-ի քարոզարշավին:
Ուշագրավ է, որ Հայկ Այվազյանը «Այո» է քարոզում Նիկոլ Փաշինյանին դատի տալուն զուգահեռ: Irakanum.am-ը ՔՊ վարչության անդամին դատի տված Հայկ Այվազյանից հետաքրքրվեց, թե ինչու է մասնակցում մի գործընթացի, որի ջատագովը իրեն պաշտոնանկ արած քաղաքական թիմն է:
«Մասնակցում եմ, որ «Այո»-ն հաղթի: Շատ տրամաբանական նպատակ է»,- ասաց նա:
Ճիշտող հարցին՝ այսինքն այս քաղաքական թիմի անդամ է, Հայկ Այվազյանը պատասխանեց. «Բացարձակ, ոչ: Շատ մեծ մոլորություն կլինի, որ մտածենք, թե միայն իշխանությունն է ուզում Այո-ն հաղթի: Ոչ, թե իշխանությունն է ուզում, այլ ժողովուրդն է ուզում: Քարոզարշավն իշխանական օրակարգ չէ եւ չպետք է լինի»:
Հիշեցնենք, որ ՀՀ Վարչական դատարան ներկայացված հայցապահանջով դատարանը պիտի վիճարկի Տեսչական մարմինների աշխատանքները համակարգող գրասենյակի ղեկավարին զբաղեցրած պաշտոնից ազատելու մասին վարչապետի արձակած հրամանի իրավաչափությունը:
Հայցում Հայկ Այվազյանը միանգամից երեք պահանջ է ներկայացրել կառավարության դեմ՝ նա ցանկանում է անվավեր ճանաչել իրեն աշխատանքից ազատելու մասին Նիկոլ Փաշինյանի հրամանը, վերականգնվել աշխատանքի, և, որ իրեն փոխհատուցեն ապօրինի հրամանի հետևանքով հարկադիր պարապուրդում գտնվելու ողջ ժամանակահատվածի համար:
Irakanum.am
