Թուրքիայի ոստիկանությունը ձերբակալել է Ադանայում ԱՄՆ հյուպատոսարանի երկու աշխատակիցների՝ սոցցանցում նրանց մասնակցությամբ տարածված տեսանյութի պատճառով: Այս մասին տեղեկացնում ermenihaber.am-ը: Հելոուինի օրվա կապակցությամբ տարածված տեսանյութում հյուպատոսարանի ազգությամբ թուրք աշխատակիցները դիտողներին առաջարկում են խմել մուսուլմանների համար սուրբ համարվող «Զամզամ» ջուրը: «Խմեք սա, ազատվեք ձեր մեղքերից, ապա ապրեք ձեր կյանքը»,- ասում է նրանցից մեկը: Դրանից հետո նա ցուցադրում է իրենից քիչ հեռու կանգնած իսլամական հագուստներով իր ընկերոջը, ով ալկոհոլ է խմում ու խոզի միս ուտում, ինչն անթույլատրելի է շարիաթի կանոններով: Ձերբակալված աշխատակիցների նկատմամբ հետաքննություն է սկսվել «ժողովրդի մեջ ատելության կամ թշնամանք  հրահրելու կամ ժողովրդին նվաստացնելու» մեղադրանքով: Վերջինները ցուցմունք տալուց հետո ազատ են արձակվել: