Նախկին վարչապետ Հրանտ Բագրատյանի վերլուծությունը, բնականաբար, ճիշտ է։ Այս մասին այսօր՝ հոկտեմբերի 24-ին, լրագրողների հետ զրույցում ասաց ՊԵԿ նախագահ Դավիթ Անանյանը։ «Ընդհանրապես պետական բյուջեի հարկային եկամուտները տարեկան կտրվածքով են հրամցվում որպես տարեկան ցուցանիշի ապահովում, կա նաեւ կիսամյակային, եռամսյակային եւ 9 ամսվա ցուցանիշ։ Մենք միջանկյալ հրապարակեցինք 25․1 ցուցանիշը ցույց տալու համար աննախադեպ տեմպը, որը տարվա ընթացքում պահպանել չէր հաջողվելու։ Մեր կարծիքով մենք կունենանք տարեկան 19-20 տոկոս ցուցանի»,-նշեց նա։ ՊԵԿ-ի քննչական վարչությունը քննչական մարմնին միացնելու մասին հարցին ի պատասխան նա նշեց, որ կան հարցեր, որոնց պատասխանը պետք է հասկանալ․  «Ես ուղղակի հնարավորություն չեմ ունեցել արտահայտել իմ տեսակետը ռազմավարությամբ նախատեսված այդ մտադրության համար, որ 3 տարվա ընթացքում պետք է իրականացվի եւ այդ ընթացքում պետք է տանք այն հարցերի պատասխանը, թե ՊԵԿ-ը իրավապահ մարմինն է, քննչական գործառույթններ պետք են ՊԵԿ-ին, թե ոչ, իմ կարծիքով՝ պետք են։ Եթե 3 տարվա ընթացքում այնպիսի ռազմավարություն մշակենք, որ արդյունավետության առումով ճիշտ որոշում կայացնենք, արդյունավետ համագործակցությունն ապահովենք արդեն Քննչական կոմիտեի կազմում, կարող ենք նաեւ այդպես անել, այս պահին ես մտահոգություններ ունեմ»։