Հարցին, թե ինչով է պայմանավորված էլեկտրաէներգիայի արտադրության 3,5 տոկոսով պակասելը, Բագրատյանը պատասխանել է. «Դուք տեսա՞ք՝ նրանք (նկատի ունի կառավարությունը-խմբ.) ինչ ողորմելի պատասխան տվեցին այդ հարցադրմանը: Ասացին՝ Ալավերդիից չի աշխատել: Կարծես թե Ալավերդին 700 միլիոն կվատ էր սպառել: Բացարձակ սուտ էր: Մենք էլ դիտողություններ արեցինք»,-ասաց նա և հավելեց, որ այս ամսվանից նրանք թվերը կշտկեն: Բագրատյանի խոսքով՝ ՀՀ քաղաքացիների համար այսօր գազի գինը կամայական կարող է լինել, որովհետև նոր իշխանությունը չզարգացրեց Իրանի հետ հարաբերությունները, որպեսզի ռուսական գազի փոխարեն առաջարկի իրանականը: «Սա հստակ տնտեսական հարց է: Գազամուղի և էլեկտրահաղորդման գծերի պայմանագրերը ես եմ ստորագրել. էլեկտրահաղորդման գիծը 1996-ին է կառուցվել, գազամուղը սկսել էին կառուցվել այդ ժամանակ, հետագայում տրամաչափը փոխել են: Պետք է գնալ, նոր գազամուղ կառուցել»,- նշեց նա: «Ծիծաղելի է, որ իրանական գազի ներկրման լայն խողովակ կառուցելու համար Ռուսաստանը Հայաստանի դեմ քայլեր անի, որովհետև դա մեր սպառման համար է: Ուրիշ է,  եթե ես իրանական գազամուղը կառուցեմ, ասեմ, սա Հայաստանից  Թուրքիա, Վրաստան, Ադրբեջան գազ արտահանելու համար է: Ռուսաստանը կասի՝ մեր շուկային խփում եք»,- նկատեց տնտեսագետը: Բագրատյանը նշեց՝ գործող իշխանությունների պրոպագանդան Ռուսաստանը մատուցում է որպես թշնամի պետություն: «Վերջ տվե՛ք այս ամենն անելուց: Ոչ մի երկիր թշնամի մի համարեք»,- ասաց նա: