Հիշեցնենք՝  երեկ՝ սեպտեմբերի 27-ին, ժամը 20:15-ի սահմաններում մի խումբ անձինք հետապնդել են Աննա Դանիբեկյանին և անհարկի հարցուպատասխանի միջոցով փորձել են հոգեբանական ճնշման ենթարկել, վիրավորել և նսեմացնել դատավորի անձը: Դատավորին թիկնապահ է տամադրվել։ ՀՀ արդարադատության նախարար Ռուստամ Բադասյանը ևս իր ֆեյսբուքյան էջում է գրառում կատարել` անդրադառնալով դեպքին։ Նախարարը  խստորեն դատապարտել  է  դատավոր Աննա Դանիբեկյանի նկատմամբ հետապնդումն ու ոտնձգությունը։ Նման դեպքերը, ըստ նրա, պետք է բացառվեն ու խստորեն պատժվեն: «Այս իրողությունը մեր իրականությունում պետք է տեղ չունենա. սա ուղղակի անթույլատրելի է»,–գրել է նախարարը։ Irakanum.am-ի հետ զրույցում փաստաբան Կարինե Լալաբեկյանն,   անդրադառնալով դատավոր Դանիբեկյանի հետ կատարված միջադեպին, նշեց՝ դատավորի հետ կատարվածը շատ լուրջ ազդակ է․ սա ճնշում է ոչ միայն դատավորի, այլև դատական համակարգի վրա։ «Ներկայիս իշխանությունը փորձում է ջանասիրաբար պաշտպանել դատավոր Դանիբեկյանին, թիկնապահ  տրամադրել, բայց այս իշխանությունները  պիտի հասկանան, որ հենց իրենք են սանձազերծել այս ամենը։ Իրենց կողմից հրահրված գործողությունների արդյունքում է, որ այսօր որոշ մարդիկ կարողանում են իրենց թույլ տալ անվանարկել դատավոր Դանիբեկյանին։ Այս իշխանությունը՝ ի դեմս վարչապետի, սանձազերծել է այս ամենը, քանի որ հենց վարչապետը  հնչեցրեց «վնգստացող դատավորներ» արտահայտությունը, իսկ դրանից հետո այդ արտահայտությունը կրկնեց ԲԴԽ նախագահը, ավելին՝  Հայկ Ալումյանն էլ իրեն թույլ տվեց դատական  նիստի ժամանակ հիշատակել այդ արտահայտությունը․ ես դա համարում եմ կոպիտ վիրավորանք, կոպիտ ապտակ դատական իշխանությանը։ Այս անգամ էլ   հերթական քայլն է կատարվում՝ միջամտելու դատական իշխանության աշխատանքին, իսկ դա անելու իրավունք չունի որևէ մեկը»։