Մամուլը գրում է՝  «Իմ քայլ»-ում իրավիճակ է ստեղծվել Սասուն Միքայելյանի շուրջ։ Նա խմբակցությունում համարվում է ոչ վստահելի մարդ, նրա ներկայությամբ շատ հարցեր չեն քննարկվում, իսկ վերջինս էլ լուրջ հակասությունների մեջ է Նիկոլ Փաշինյանի հետ, ինչն առաջիկայում կդրսեւորվի հրապարակային հայտարարություններով եւ քայլերով։ Անդրադառնալով «Իրատես»-ի վերենշյալ հրապարակմանը՝  irakanum.am-ի հետ  զրույցում ԱԺ «Իմ քայլը» խմբակցության անդամ Արսեն Միխայլովը նշեց՝ նման  բան չի նկատել։ «Ես նման բան չեմ նկատել, տեղյակ չեմ։ Խմբակցության վերջին նիստերին ևս մասնակցել եմ, բայց, իսկապես, նման բան չեմ նկատել։ Գուցե, մեկ-երկու հոգի նման մոտեցում ունեն, սակայն խմբակցությունում նման բան չեմ նկատել», -  ասաց Արսեն Միխայլովը։ Իշխող խմբակցության  պատգամավոր Սոֆյա Հովսեփյանը ևս մեր թղթակցի հետ զրույցում նշեց՝ չի նկատել, որ Սասուն Միքայելյանի հետ կապված՝ խմբակցությունում նման վերաբերմունք լինի։ «Իրականում խմբակցության վերջին մի քանի նիստերին ներկա չեմ եղել քաղաքից բացակայելու պատճառով, ուստի տեղյակ չեմ՝ պարոն Միքայելյանը   ներկա եղել է, թե ոչ,  բայց մնացած առումներով երբեք նման բան չեմ նկատել, այդպիսի հարց չի էլ քննարկվել, մնան խոսակցություն չի շրջանառվել, այնպես որ, դժվար թե նման բան լինի, թիմակիցների կողմից նրա նկատմամբ չկա այդպիսի մոտեցում», - նշեց  Սոֆյա Հովսեփյանը։ Հավելենք, որ «Իմ քայլը» խմբակցության ղեկավար Լիլիթ Մակունցի հետ   այդպես էլ չհաջողվեց   կապ հաստատել։