Այսօր՝ սեպտեմբերի 23-ին, խոշոր ավտովթար է տեղի ունեցել Սյունիքի մարզում: Ժամը 11:05-ի սահմաններում Իրանի Իսլամական Հանրապետության քաղաքացի, 39-ամյա Նասրոլլահի Խ.-ն իր վարած Scania մակնիշի հեղուկ գազ տեղափոխող բեռնատարով Կապան-Քաջարան ավտոճանապարհի 6-րդ կմ հատվածում, դեռևս անհայտ պայմաններում, դուրս է եկել ճանապարհի երթևեկելի գոտուց և մոտ 30 մետր գլորվել ձորը: Ինչպես հայտնում է Shamshyan.com-ը, վթարի հետևանքով, ըստ նախնական տեղակությունների, զոհեր և վիրավորներ չկան, սակայն եղել են կասկածներ, որ հնարավոր է՝ գազի արտահոսք եղած լինի: Օպերատիվորեն ժամանել է ԱԻՆ ՓԾ Սյունիքի մարզային փրկարարական վարչության հրշեջ-փրկարարական ջոկատից 1 մարտական հաշվարկ, ինչպես նաև Սյունիքի մարզային ճգնաժամային կառավարման կենտրոնի օպերատիվ խումբը: Փրկարարները հոսանքազրկել են բեռնատարը: Օպերատիվորեն ժամանել են նաև ճանապարհային ոստիկանության 2-րդ սպայական գումարտակի 6-րդ վաշտի 2-րդ դասակի ծառայողները՝ վաշտի հրամանատար Գեղամ Մարգարյանի, դասակի հրամանատար Արմեն Սարգսյանի գլխավորությամբ: Փաստի առթիվ նույն վաշտի հետաքննիչի կողմից նյութեր են նախապատրաստվում: