Irakanum.am-ը   շարունակում է ձեր ուշադրությանը ներկայացնել «Սպորտը հայտնի մարդկանց կյանքում»  շարքը։   Այս անգամ կփորձենք բացահայտել, թե դասական երգչուհի Հասմիկ Հարությունյանի կյանքում ինչ  տեղ է զբաղեցնում սպորտը։ - Սպորտով զբաղվո՞ւմ եք։ -Ժամանակ ունենալու դեպքում  սիրում եմ վազել։ Դպրոցական տարիներին ևս  իմ նախընտրած  մարզաձևը վազքն էր, իսկ ֆիզկուլտուրայի դասերին բավական ակտիվ էի։ Պետք է շեշտեմ նաև, որ ֆուտբոլասեր եմ։ - Հետևո՞ւմ եք առողջ սննդակարգ ունենալու սկզբունքներին։ - Ծանրաբեռնված օրակարգի և զբաղվածության պատճառով ցավոք սնվում եմ անկանոն, սակայն հնարավորինս փորձում եմ լինել շարժման մեջ, շատ քայլել, լինել ակտիվ, գերադասել բուսական և բնական մթերքները: - Արդեն նշեցիք, որ ֆուտբոլասեր եք, իսկ   ո՞ր ակումբներին եք երկրպագում։ - Բարսելոնային։ - Սիրո՞ւմ եք ֆուտբոլային հանդիպումներին հետևել հենց մարզադաշտում։ - Վերջին անգամ մարզադաշտից հետևել եմ դպրոցական   տարիներին, չնայած կարծում եմ՝ խաղի ողջ էներգիան և հետաքրքրությունը հենց խաղին ներկա լինելու մեջ է: - Ո՞ր ֆուտբոլիստներին կառանձնացնեք։ - Դիեգո Մարադոնա, Լիոնել Մեսսի, Ռոբերտո Կառլոս: - Հայաստանի հավաքականի խաղերին հետևո՞ւմ եք։ Ի՞նչ կասեք վերջին հանդիպումների մասին։ - Հետևում եմ մեծ խնդությամբ, ոգևորվածությամբ և կարող եմ ասել՝ հատկապես վերջին` Հայաստան-Հունաստան հանդիպմանը բավականին բարձր վարպետությամբ աչքի ընկան մեր հավաքականի մարզիկները և արդար, արժանի և ցնծալի հաղթանակ պարգևեցին  հայ ազգին: - Եթե մարզիկ լինեիք, ո՞ր մարզաձևում հանդես կգայիք։ - Կնախընտրեի լողը։ - Աշխարհահռչակ ո՞ր մարզիկի հետ կուզենայիք հանդիպել, զրուցել, հարցեր ուղղել․․․ - Դիեգո Մարադոնայի: -  Օլիմպիական խաղերին հետևու՞ւմ եք։ - Այո, հետևում եմ։ Առանձնակի ուշադրությամբ հետևում եմ հատկապես ծանրամարտին, հատկապես հայ մարզիկների մրցելույթներին։ -Կուզենայի՞ք ներկա գտնվել Օլիմպիական խաղերին, եթե նման հնարավորություն ընձեռվեր։ -Իհարկե։ Կարծում եմ՝ օլիմպիական բոլոր մարզաձևերն  էլ ունեն իրենց յուրահատկությունները, առանձնահատուկ էներգիա են պարգևում մարդկանց։ Այնպես որ, միանշանակ,  բաց չէի թողնի Օլիմպիական խաղերին ներկա գտնվելու  հնարավորությունը։