Armsport.am-ը գրում է. Ցավալի լուր է ստացվել Իսպանիայից։ 35 տարեկան հասակում մահացել է Խոսե Անտոնիո Ռեյեսը։ Պատճառը ավտովթարն է։ Երեկ երեկոյան դեռևս չբացահայտված հանգամանքներում իսպանացի ֆուտբոլիստը ավտովթարի է ենթարկվել հայրենի Ուտրերա քաղաքից դուրս գալիս։ Րոպեներ առաջ Ռեյեսի նախկին թիմերից «Սևիլիայի» պաշտոնական էջը հաստատել է տեղեկությունը։ Խոսե Անտոնիո Ռեյեսը «Սևիլիայի» սան էր։ 2000-2004 թվականներին նա հանդես է եկել անդալուսիական ակումբում։ 2004 թվականին տեղափոխվել է Լոնդոնի «Արսենալ»։ 2006-2007 մրցաշրջանը վարձակալական հիմունքներով անց է կացրել Մադրիդի «Ռեալի» կազմում։ Հանդես է եկել նաև Մադրիդի «Ատլետիկոյում», «Բենֆիկայում», «Էսպանյոլում», «Կորդոբայում»։ 2018 թվականին տեղափոխվել էր Չինաստանի սուպեր լիգան ներկայացնող «Տիանշեն Լեոպարդ» ակումբ։ Ներկա պահին հանդես էր գալիս իսպանական «Էստրեմադուրայի» կազմում։ Ռեյեսը հանդես է եկել նաև Իսպանիայի ազգային հավաքականի կազմում՝ անցկացնելով 21 հանդիպում։