Վլադիմիր Կարապետյանը ողջունում է Յոհաննես Հանի հայտարարությունը

Վարչապետ մամուլի քարտուղար Վլադիմիր Կարապետյանն անդրադարձել է Եվրոպական հանձնաժողովի հարևանության քաղաքականության և ընդլայնման բանակցությունների հարցերով ԵՄ հանձնակատար Յոհաննես Հանի՝ ղարաբաղյան հակամարտության վերաբերյալ հայտարարությանն ու դրա շուրջ մանիպուլյատիվ գործողություններին: «Ողջունում ենք Եվրոպական հանձնաժողովի հարևանության քաղաքականության և ընդլայնման բանակցությունների հարցերով ԵՄ հանձնակատար Յոհաննես Հանի հայտարարությունը, որ Լեռնային Ղարաբաղի հակամարտության կարգավորման շուրջ բանակցությունները պետք է ընթանան գործող՝ ԵԱՀԿ Մինսկի խմբի համանախագահների ձևաչափով:

Ինչպես բազմիցս նշել է վարչապետ Փաշինյանը, առարկայական բանակցություններ ունենալու համար անհրաժեշտ է ապահովել դրանցում Լեռնային Ղարաբաղի ներկայացուցիչների ներգրավվումը:

Մեզ համար նորություն չէ, որ Ադրբեջանը պարբերաբար հանդես է գալիս փաստերը խեղաթյուրող գնահատականներով: Կոչ ենք անում որոշ վերլուծաբաններին չտրվել մանիպուլյացիաների»,- Ֆեյսբուքի իր էջում գրել է Վլադիմիր Կարապետյանը: Հիշեցնենք, որ Բրյուսելում ՀՀ վարչապետի հետ համատեղ ասուլիսում լրագրողը, դիմելով Նիկոլ Փաշինյանին և Յոհաննես Հանին, հանդես էր եկել հետևյալ հարցով. «Պարոն վարչապետ, վերջին շրջանում մի քանի անգամ հանդիպել եք Ձեր ադրբեջանցի գործընկերներին: Կցանկանայինք իմանալ՝ կան արդյոք նոր շեշտադրումներ, որ հնարավոր է հրապարակել: Եթե կարելի է՝ կցանկանայինք պարոն Հանի արձագանքը լսել այն հարցի շուրջ, թե Եվրամիությունն ինչպե՞ս կարող է ավելացնել աջակցությունը ղարաբաղյան հակամարտության խաղաղ կարգավորման արագացման ուղղությամբ»: Վարչապետ Նիկոլ Փաշինյանն իր պատասխանում ընդգծել էր, որ Հայաստանի դիրքորոշումը չի փոխվել, որ ԼՂ հարցի արդյունավետ կարգավորման համար նախ և առաջ անհրաժեշտ է արդյունավետ ֆորմատ ստեղծել, որի նպատակը բանակցային գործընթացին Լեռնային Ղարաբաղի մասնակցությունն ապահովելն է: Իր հերթին, Յոհաննես Հանն ասել էր. «Ինչ վերաբերում է մեր աջակցությանը, կարծում եմ, որ պետք է թողնենք ամեն ինչ գործող ֆորմատով, որտեղ քննարկումներ և բանակցություններ են ընթանում, նոր բան չստեղծենք: Մենք պետք է աջակցենք, բայց միայն կողմերի խնդրանքով և պահանջով, որովհետև կողմերը գիտեն ինչ անել, ինչպես աշխատել միմյանց հետ, և մենք պետք է ուղղակի պատրաստ լինենք աջակցել, եթե կողմերը մեզ դրա մասին խնդրեն»: Այսինքն, ակնհայտ է, որ Յոհաննես Հանը խոսել է ԵԱՀԿ Մինսկի խմբի համանախագահության ձևաչափով բանակցային ֆորմատի և դրանում Եվրոպական միության ներգրավվածության հնարավորության մասին: Ցավոք, որոշ տեղական վերլուծաբաններ տրվել են ադրբեջանական մանիպուլյատիպ մեկնաբանություններին ու հանդես եկել փաստերը խեղաթյուրող մեկնաբանություններով: