Արդեն մի քանի ժամ է, ԱԻՆ ՓԾ հատուկ նշանակության փրկարարական աշխատանքների իրականացման կենտրոնի թիվ 16 փրկարարական ջոկատը Կոտայքի մարզի Արզականի վարչական տարածքում գտնվող «Մամադալի» կոչվող անտառային հատվածում որոնողական աշխատանքներ է կատարում՝ հայտնաբերելու անտառում մոլորված՝ Ֆրանսիայի Հանրապետության 5 քաղաքացիներին։ Այս մասին հայտնում են Shamshyan.com-ից: Կայքը հայտնում է, որ փրկարարները 7 կմ-ից ավելի ոտքով անցել են: Տարածքը դժվարանցանելի է եղել, ձյան բարձրությունը մինչև 2.5-3 մետր է եղել: Որոնողական աշխատանքների արդյունքում փրկարարները հայտնաբերել են կորածներին։ ՊՆ ուղղաթիռն էլ դեպքի վայրում հայտնաբերել է փրկարարներին ու մոլորվածներին ու հիմա փորձում է հարմար դիրք գտնել, որ կարողանա մոտենալ նրանց: Քիչ առաջ դեպքի վայրից ռադիոկապով հաղորդել են, որ լեռնագնացներից չորսի վիճակը կայուն է, մեկն էլ սառած է և կարծես կենդանության նշաններ է ցույց տալիս, նրան տեղում փրկարարները օգնություն են ցուցաբերում, ուղղաթիռը նրան կտեղափոխի  մոտակա հիվանդանոցներից մեկը։