Բելառուսում Հայաստանի Արտակարգ եւ լիազոր դեսպան Արմեն Ղեւոնդյանը հանդիպել է երկրի վարչապետ Սերգեյ Ռումասի հետ։ Ինչպես տեղեկացրել են Հայաստանի ԱԳՆ մամուլի ծառայությունում, հանդիպման ընթացքում զրուցակիցները քննարկել են մի շարք հարցեր, որոնք վերաբերել են հայ-բելառուսական համագործակցության օրակարգին։ Երկու կողմերն ընդգծել են համատեղ ջանքերի կարեւորությունը առեւտրատնտեսական երկկողմ հարաբերությունների ինչպես ավանդական, այնպես էլ նորարարական, բարձրտեխնոլոգիական ուղղություններում, ինչը կարող է նպաստել փոխգործակցության հետագա զարգացմանն ու ընդլայնմանը։ Այս համատեքստում, ինչպես նաեւ հեռանկարային փոխշահավետ ծրագրերի իրականացման առումով, ընդգծվեց հայ-բելառուսական միջկառավարական հանձնաժողովի գործունեության կարեւորությունը, որի հաջորդ նիստը տեղի կունենա Հայաստանում։ Զրուցակիցները մտքեր են փոխանակել Հայաստանի եւ Բելառուսի միջեւ համագործակցության մասին՝ բազմաձեւաչափ եւ ինտեգրացիոն կառույցների շրջանակներում։