Հանրային վայրերում ծխելն արգելելու օրենքում փոփոխություններ մտցնելու վերաբերյալ մասնագիտական քննարկումներ են սկսվել, և այն աշնանային նստաշրջանին ներկայացվելու է Ազգային ժողով: Այս մասին Tert.am-ին հայտնեց ՀՀ ԱՆ Առողջապահության ազգային ինստիտուտի տնօրեն Ալեքսանդր Բազարչյանը:
Նրա խոսքով՝ օրենքի փոփոխությունների նախագծում տուգանքների ուղղությունը փոխվել է. նոր օրենքում ավելի շատ և բարձր տուգանվելու են հաստատությունները, քան անհատները:
«Տուգանքների իջեցում, չեմ կարող ասել, նախատեսվում է, թե ոչ, բայց տուգանքների վերաբերյալ նոր քաղաքականություն է իրականացվելու, և հիմնական շեշտը դրվելու է ոչ թե ֆիզիկական անձանց, այլ իրավաբանական անձանց վրա: Տուգանքների չափը պետք է լինի մոտավորապես այնքան, որ ինքն ազդեցիկ, կանխարգելիչ լինի, որ մարդիկ չծխեն, և որ հիմնարկները հետևեն այս օրենքների կիրառմանը»,-ասաց նա:
Մասնագիտական քննարկումներից հետո օրենքի նախագծում փոփոխություններ են լինելու՝ սկսած անվանումից, վերջացրած տարբեր կետերով: Քննարկվում են նաև պատժամիջոցների, պատժամիջոցների սկզբունքների վերաբերյալ հարցերը:
«Մենք մոտ 1 ամիս ժամանակ ունենք, որ վերլուծենք բոլոր առաջարկությունները, որ նախկինում եղել են՝ ինչպես հասարակության կողմից, այնպես էլ հասարակական կազմակերպությունների և միջազգային կազմակերպությունների կողմից: Հաշվի առնենք բոլոր առաջարկությունները, որ եղել են միջազգային առողջապահական կազմակերպությունների կողմից: Եվս մեկ անգամ համեմատենք օրենքի նախագիծը միջազգային նորմերի հետ և ներկայացնենք օրենքի նախագիծ, որը շատ համերաշխ և հասարակության համար ընկալելի տարբերակով կքննարկվի»,- նշեց Ալեքսանդր Բազարչյանը:
Առողջապահության ազգային ինստիտուտի տնօրենի տեղեկացմամբ՝ քննարկումներ են իրականացվում նաև ծխախոտային ապրանքների տեսակների, վաճառքի սահմանափակումների, բաց և փակ հասարակական տարածքների իրավական խնդիրներ հետ կապված:
Ընդ որում, նախագծի վերաբերյալ փորձագիտական քննարկումներ են իրականացվում ինչպես տեղական փորձագետների, այնպես էլ միջազգային փորձագետների հետ:
«Խնդիրը նախագծի ընդունելի, չընդունելի լինելու մեջ չէ, խնդիրն այն է, որ մենք ստեղծենք օրենքի նախագիծը, որի արդյունքում մեր բնակչությունը կլինի ավելի առողջ: Եթե մենք ընդունենք օրենքի նախագիծ, որն ընկալելի է այս կամ այն հասարակական խմբի կողմից, բայց լինի անարդյունավետ, ոչ մի փոփոխություն չբերի, և առողջությունը չպահպանվի, ապա այդ օրենքի նախագիծն անիմաստ է ընդունելը: Մենք ներկայացնելու ենք այնպիսի օրենքի նախագիծ, որը օգտակար կլինի բնակչությանը՝ առողջության պահպանման առումով: Մենք տնտեսական կամ այլ նպատակ չենք հետապնդում, մենք նպատակ ենք հետապնդում, որ մեր բնակչությունը լինի առողջ»,- հայտնեց Ա. Բազարչյանը:
00:00:00
