Իսրայելի վարչապետ Բենիամին Նեթանյահուի գրասենյակը հայտնել է, որ Սպիտակ տան կողմից Գազայի Խաղաղության խորհրդի գործադիր կոմիտեի երեկվա բացումը «չի համաձայնեցվել Իսրայելի հետ եւ հակասում է նրա քաղաքականությանը», տեղեկացրել է Times of Israel-ը։
Գործադիր կոմիտեի կազմում են Թուրքիայի եւ Կատարի բարձրաստիճան պաշտոնյաներ, որոնք խիստ քննադատել են Իսրայելին Գազայում պատերազմ սկսելու համար։ Թեեւ այն տեխնիկապես կգործի Խաղաղության խորհրդի հովանու ներքո, որը նախագահում է Թրամփը եւ ներառում է համաշխարհային առաջնորդներ, գործադիր կոմիտեն ավելի անմիջականորեն կներգրավվի Գազայի հետպատերազմյան կառավարման վերահսկման գործում՝ խաղալով վճռորոշ դեր, ի տարբերություն ավելի խորհրդանշական Խաղաղության խորհրդի։
Նեթանյահուի գրասենյակի հայտարարության մեջ ասվում է, որ վարչապետը հանձնարարել է արտգործնախարար Գիդեոն Սաարին ամերիկացի գործընկեր Մարկո Ռուբիոյի հետ քննարկել Իսրայելի անհամաձայնությունը գործադիր կոմիտեի կազմի վերաբերյալ։
Ավելի վաղ հայտնի էր դարձել, որ Թրամփը հրավիրել է Թուրքիայի նախագահ Ռեջեփ Թայիփ Էրդողանին եւ արտգործնախարար Հաքան Ֆիդանին միանալ Գազայի Խաղաղության խորհրդին։
