Զրահաբաճկոնները և առհասարակ ռազմական նշանակության ապրանքները ներկրվում և ձևակերպումներ են ստանում համապատասխան ընթացակարգով, որն իրենից գաղտնիություն է ենթադրում: Ռազմական նշանակության ապրանքների քանակների, տեսակների, գների վերաբերյալ հանրային տեղեկություն չի կարող ներկայացվել. այսօր լրագրողների հետ հանդիպման ժամանակ ասաց ՊԵԿ նախագահ Էդվարդ Հովհաննիսյանը՝ անդրադառնալով պարտերազմի օրերին 600 դոլարով զրահաբաճկոններ ներմուծելու վերաբերյալ հայտարարությանը:
Հարցին, թե քննություն սկսվե՞լ է ներմուծման գործընթացում կոռուպցիոն ռիսկերի համար, Հովհաննիսյանը նշեց, որ ներմուծման գործընթացում որևէ կոռուպցիոն ռիսկ չեն տեսել, որևէ քննություն և գործընթաց սկսելու հիմքեր չեն արձանագրել:
Անդրադառնալով հարցին, թե Ֆրանսիայից եկած հումանիտար օգնությունը չի հասել նպատակին, քանի որ մաքսազերծման հետ կապված խնդիրներ են առաջացել, Հովհաննիսյանը նշեց, որ ՊԵԿ -ը անդրադարձել է հարցին, խնդիրները մաքսային ձևակերպումների հետ չեն կապված. «Առհասարակ պատերազմի առաջին օրերից Հայաստան ուղարկված, ներկրված բոլոր ապրանքների մաքսային ձևակերպումների հետ կախպված խնդիրներ չեն եղել, դրանք խնդիրներ են, որոնք կապված չեն մաքսային ձևակերպումների հետ, իսկ տվյալ դեպքի վերաբերյալ ապրանքը ներմուծվել է հասարակական կազմակերպության անունից և ըստ ՀՀ և մաքսային ընթացակարգերը կարգավորող ԵՏՄ օրենսդրության՝ ապրանք ներկրողն է պարտավոր որոշակի փաստաթղթեր, հայտարարագիր ներկայացնել՝ պահանջվող կից փաստաթղթերով, որպեսզի ձևակերպումների գործընթացը սկսվի, իսկ տվյալ դեպքում հայտարարատուն այդպիսի փաստաթղթեր չէր ներկայացրել»:
Անդրադառնալով ՊԵԿ փոխնախագահ Ռաֆիկ Մաշադյանի անվան հետ կապված այն հրապարակումներին, որ ամռանը Սոչիում այցելել է խաղատուն՝ Հովհաննիսյանը պատասխանեց, որ Ռաֆիկ Մաշադյանն իր մասին հրապարակմանը անդրադարձել և պարզաբանում տվել է և ավելացնելու ոչինչ չունի:
Հարցին, թե նախկինում ասել է, որ տեղեկությունն ուսումնասիրվում է, ի՞նչ պարզվեց, ՊԵԿ նախագահը պատասխանեց, որ պարզել են այն, ինչ Մաշադյանը ներկայացրել է հանրությանը:
Լրագրողի մյուս հարցին, թե դա ռիսկեր պարունակո՞ւմ է, որ երկրի ֆինանսական ելքերն իրականացնող կառույցի՝ ՊԵԿ-ի բարձրաստիճան պաշտոնյան այցելում է խաղատուն, քանի որ ԱԱԾ-ն մի քանի դեպք է հրապարակել, երբ հաշվապահները փողերը վերցրել են ու գնացել են խաղատուն, Հովհաննիսյանը պատասխանեց, որ եթե հաշվապահներն իրենց ձեռքի տակ եղած կանխիկ գումարը կարող են վերցնել ու գնալ խաղատուն, ապա պետական մուտքերը Պետական եկամուտների կոմիտեում կանխիկ չեն մուտքագրվում, որ ինչ -որ մեկն էլ կարողանա վերցնել ու գնալ խաղատուն.
«Խաղատուն գնալը հակաիրավական արարք չէ, իսկ Ձեր կողմից նշված ռիսկեր մենք չենք տեսել: Շատ հնարավոր է, որ ես էլ գնամ հանգստի և ընկերների հրավերով այցելեմ խաղատուն, դա հակաիրավական վարքագիծ իր մեջ չի պարունակում»:
Հարցին, թե դա ՊԵԿ-ի վարկանիշի վրա կարո՞ղ է ազդել, Էդվարդ Հովհաննիսյանը պատասխանեց՝ վարկանիշի վրա ազդելը սուբյեկտիվ ընկալում է և յուրաքանչյուրի մոտ՝ անհատական:
Անդրադառնալով սահմանների ապաշրջափակմանը և դրա տնտեսական նշանակությանը, թե արդյո՞ք ՊԵԿ-ում հաշվարկներ և կնախատեսումներ կան, թե դա ինչեպե՞ս կազդի տնտեսության վրա, ՊԵԿ նախագահն ասաց, որ ապաշրջափակման վերաբերյալ մոտեցումները և նմանատիպ հարցերը քննարկման մեջ են, և վերջնական պատկեր չկա. «ՊԵԿ-ը նույնպես իր մասով մասնակից է այդ քննարկումներին, այս պահին հաշվարկներ անել հնարավոր չէ, քանի որ դեռ պատկեր կոնկրետ չունենք, թե որտեղից է սահման բացվելու, ինչպիսի՞ տնտեսական հնարավորություններ են ավելանալու»:
00:00:00
