Ռոբերտ Նազարյանին կալանավորելու վերաբերյալ միջնորդության գործով դատարանը գնաց խորհրդակցական սենյակ, որոշումը կհրապարկվի այսօր: Այս մասին այսօր` օգոստոսի 8-ին, լրագրողներին ասաց Ռոբերտ Նազարյանի պաշտպան Գագիկ Խաչիկյանը:
«Դատարանի որոշումը չի հրապարակվել, կհրապարակվի պատրաստ լինելուն պես, միջնորդության քննարկումը ավարտել ենք, սպասում ենք որոշման հրապարակմանը»,- ասաց նա:
Նշենք նաեւ, որ դատարանում այսօր քննվել է նաեւ նրա ձերբակալման որոշումը:
Հիշեցնենք, որ Երեւանի նախկին քաղաքապետ, Հանրային ծառայությունները կարգավորող հանձնաժողովի նախկին նախագահ Ռոբերտ Նազարյանին մեղադրանք է առաջադրվել ՀՀ ՔՕ 308-րդ հոդվածի 2-րդ մասով (Պաշտոնեական լիազորությունները չարաշահելը, որն անզգուշությամբ առաջացրել է ծանր հետեւանքներ)։
Նշենք, որ ՀՔԾ-ն այդ առնչությամբ տարածել էր հայտարարություն։
Ըստ ՀՔԾ հաղորդագրության՝ Ռոբերտ Նազարյանը ձերբակալվել է պաշտոնեական լիազորությունները չարաշահելու կասկածանքով։ Փաստական տվյալներ են ձեռք բերվել, որ Նազարյանն առանձին տնտեսվարող սուբյեկտի համար արտոնություններ սահմանելու անձնական շահագրգռվածությունից եւ խմբային շահերից ելնելով՝ 2011 թվականի ընթացքում չարաշահել է իր պաշտոնեական լիազորությունները, որն անզգուշությամբ առաջացրել է ծանր հետեւանքներ:
00:00:00
