Կորոնավիրուսային ինֆեկցիայով վարակվելուց հետո մարդու մոտ զարգանում է ամենեւին ոչ թոքաբորբ, այլ միանգամայն այլ բան: Ինչպես հայտնում է newsru.com-ը, COVID-19-ի զոհերի դիահերձման ժամանակ հայտնաբներվել են անոթների պատերի ախտահարումներ, ինչպես նաեւ հեմոգլոբինի ախտահարում: «Սա ամենեւին թոքաբորբ չէ: Թոքաբորբին հատուկ է հիվանդության բորբոքային ծագումը՝ մանրէային կամ մանրէավիրուսային հարուցիչով, կամ հարուցիչների բարդ զուգակցության ձեւավորմամբ, որից հետո զարգանում է տեղային բորբոքային պատասխան»,- «Նորությունների հանրային ծառայության» հետ հարցազրույցում ասել է  բժիշկ-պաթոլոգոանատոմ, կլինիկական դեղագործ Ալեքսանդր Էդիգերը: Նրա խոսքով՝ «սովորական» թոքաբորբի դեպքում բորբոքումն «ունենում է ժամանակի իմաստով բավականին օրգանական պրոցես, եւ այդ պրոցեսը պետք է հետեւանք ունենա: Հետեւանքները կարող են մի քանիսը լինել, ամենածայրահեղ դեպքում՝ ճակատագրական վախճան, հիվանդացածի մահ»: Իսկ հիվանդության դեպքում, որը զարգանում է կորոնավիրուսով վարակվածների մոտ, ախտահարվում են անոթների պատերը եւ արյան բջիջները: Թվում է, որ ախտահարվում են ոչ միայն թոքերում, այլեւ անոթներում, ինչպես նաեւ մարսողական տրակտում եղած ռեցեպտորները: Ավելին՝ վիրուսն ախտահարում է էրիթրոցիտներում հեմոգլոբինը, ինչն էլ առաջացնում է հիպոքսիկ համախտանիշ՝ թթվածնի անբարարություն: «Ես արդեն տեսել եմ 15 ողջ մարդու եւ մահվան 7 դեպք, որպես պաթոլոգոանատոմ՝ ես նրանց մանրակրկիտ զննել եմ եւ կարող եմ ասել, որ դա զուտ թոքաբորբ չէ: Այս եզրահանգումը սկզբունքային կարեւորություն ունի: Մենք գործ ունենք թոքերի անչափ յուրահատուկ ախտահարման հետ: Այս վիրուսը մեզ համար անակնկալների կույտ է ստեղծել»,- ասել է մասնագետը: Հոնկոնգի մասնագետներն ավելի վաղ հայտնել էին, որ ծանր ձեւի կորոնավիրուսով հիվանդացած եւ առողջացած հիվանդները նույնիսկ ապաքինվելուց հետո լրջագույն բարդությունների են բախվում. նրանց մոտ դիտվում է թոքերի ծավալի փոքրացում, ուղեղի աշխատանքի վատթարացում: Արքայադուստր Մարգարեթի հիվանդանոցին առընթեր Ինֆեկցիոն հիվանդությունների կենտրոնի ղեկավար, բժիշկ Օուեն Ցանգ Թաք Ինը հայտնել է, որ դուրս գրված որոշ պացիենտների մոտ գրանցվել է թոքերի գործունեության 20-30 տոկոսով նվազում: Մասնագետները չեն բացառում, որ սա կարող է բերել իդիոպաթիկ թոքային ֆիբրոզի զարգացման՝ հիվանդություն, որի դեպքում թոքային հյուսվածքը փոխարինվում է շարակցական հյուսվածքով, որի հետեւանքով թոքերը կորցնում են թթվածին վերցնելու ունակությունը: Նաեւ տվյալներ կան, որ նոր վիրուսը հարձակվում է սրտամկանի վրա եւս: Համենայնդեպս, սրտի հետ կապված բարդություններ են գրանցվել COVID-19-ով շատ պացիենտների մոտ: Մայոյի Բժշկական կրթության եւ գիտական հետազոտությունների հիմնադրամի (ԱՄՆ) մասնագետների տվյալներով՝ պացիենտների մի մասի մոտ այդպիսի բարդությունները բորբոքային ռեակցիայի հետեւանք են, իսկ մյուսների մոտ տեղի է ունենում սրտամկանում COVID-19-ի օջախի առաջացման պատճառով: Վարակվածների մոտ հայտնաբերվում է երկու խնդիր՝ կապված սիրտ-անոթային համակարգի աշխատանքի հետ. սրտային անբավարարություն եւ առիթմիա, որը կարող է նաեւ կորոնավիրուսային ինֆեկցիայի բուժման համար ընդունվող դեղերի կողմնակի էֆեկտ լինել: Մասնագետները բարդություններից խուսափելու համար մարդկանց խորհուրդ են տալիս չանտեսել պարբերական ֆիզիկական ծանրաբեռնվածությունը, որը նվազեցնում է թե՛ թոքերի, թե՛ սրտի կողմից բարդությունների զարգացման հավանականությունը: Վիրջինիա նահանգի համալսարանի բժշկագիտության դեկտոր եւ UVA  Սիրտ-անոթային հետազոտությունների կենտրոնի Կմախքային մկանների հետազոտությունների կենտրոնի տնօրեն Չժեն Յանը պնդում է, որ սպորտով զբաղվելիս արտադրվում է հզոր հակաօքսիդանտ, որը հայտնի է որպես «արտաբջջային սուպերօքսիդդիսմուտազա» (EcSOD): Այն ամրապնդում է օրգանիզմը եւ պաշտպանում ազատ ռադիկալներից: