«Այն, ինչ-որ մենք տեսանք ցավոք սրտի բավականին տմարդի վերաբերմունք էր եւ անձնական ցավակցության  բացակայությունը բավականին աղաղակող: Կառավարության արձագանքը արդյոք համարժեք է այն իրավիճակին, որը ստեղծվել է:  Օրը չի, որ ես էսօր դրա մասին շատ խոսեմ, բայց որպես ՀՀ քաղաքացի ունեմ շատ մեծ նստվածք, այս վերաբերմունքը տմարդի էր, ուղղակի չի տեղավորվում քաղաքական տրամաբանության մեջ, որովհետեւ այստեղ բացարձակ չկա քաղաքականություն, բայց սա ահազանգ է նաեւ երկրում տիրող ատելության մթնոլորտի, անհանդուրժողականության, խորացող բաժանարար գծերի, անբարոյականության, բարոյականության ճգնաժամի, ես չգիտեմ` էլ ինչ պետք է լինի, որ մեր հասարակությունը, ղեկավարությունը հասկանա, որ սա ճանապարհ չէ, որ հասարակությունը այսպես բզիկ-բզիկ անել, չօգտագործելով հնարավորությունը հասարակությունը միավորելու, ես այստեղից լավ հոտ չեմ առնում: Մարդկայնորեն հիասթափված եմ Նիկոլ Փաշինյանի այդ տմարդի վերաբերմունքից եւ ուզում եմ ասեմ` սա ճիշտ չէ»։ Այս մասին, լրագրողների հետ զրույցում ասաց ՀՀԿ փոխնախագահ Արմեն Աշոտյանը, ով մասնակցում է ԱԱԾ նախկին տնօրեն Գեորգի Կուտոյանի հոգեհանգստի արարողությանը։ Նա նշեց, որ Կուտոյանը բանիմաց եւ շատ հայրենասեր կադր էր: Աշոտյանը  չցանկացավ մեկնաբանել Կուտոյանի մահվան հանգամանքներին եւ առաջ քաշված վարկածներին: Հարցին՝ Սերժ Սարգսյանը այսօր գալո՞ւ է, Արմեն Աշոտյանն ասաց. «Իհարկե, այսօր հաստատ գալու է»: ՀՀԿ-ականներից Գեորգի Կուտոյանի հոգեհանգստի արարողությանը ներկա են նաև Գալուստ Սահակյան,  Վահրամ Բաղդասարյանը, Կարինե Աճեմյանը: Ներկա է նաեւ Արփինե Հովհաննիսյանը։ Հիշեցնենք, որ Երեւան քաղաքի Պարույր Սեւակի փողոցի բնակարաններից մեկում հայտնաբերվել է ԱԱԾ նախկին պետ Գեորգի Կուտոյանի դին՝ հրազենային վիրավորումով: Նրա դին հայտնաբերել է կինը: Հարուցվել է քրեական գործ` ինքնասպանության հասցնելու հոդվածով: