Մամուլին մանրամասներ են հայտնի դարձել քաղաքացիական հասարակության ներկայացուցիչներ-Նիկոլ Փաշինյան  հանդիպումից, որը տեղի է ունեցել մոտ տասն օր առաջ։ Մասնավորապես, «Ժողովուրդ» օրաթերթի տեղեկություններով` վարչապետն իրականում այնքան էլ գոհ չէ քաղաքացիական հասարակության ներկայացուցիչների գործունեությունից, ավելին` նրանցից մի քանիսին մեղադրել է նաև մանիպուլյացիաներ անելու մեջ, և խոսքը հատկապես վերաբերել է Ամուլսարի հանքի շահագործման թեմային։ Իրավիճակը հանգեցրել է նրան, որ վարչապետը հայտարարել է` և´ Ստամբուլյան կոնվենցիան է վավերացվելու, և՛ Ամուլսարի հանքն է շահագործվելու: Հարց  է առաջանում․ այդ դեպքում Փաշինյանի վարկանիշը չի՞ նվազի նման  որոշումների արդյունքում, և  արդյո՞ք հասարակությունը դեմ չի գնա  այս որոշումներին։ Անդրադառնալով վերոնշյալ հարցերին՝ քաղաքագետ Ռուբեն Մեհրաբյանը irakanum.am-ի հետ զրույցում նշեց․ «Մինչև հանքի շահագործումը դեռ շատ փուլեր կան, որոնք պետք է անցնել ու դեռ չենք անցել։ Դժվար է ասել՝ ինչ կլինի այդ ընթացքում։ Ամեն  փուլ ու ենթափուլ «եթե»-ներ ունի»։ Խոսելով Փաշինյանի վարկանիշի մասին ՝  Ռուբեն Մեհրաբյանը նշեց՝ ցանկացած  երկրում  շատ բարձր  վարկանիշ ունեցող քաղաքական գործչի  վարկանիշ ժամանակի ընթացքում անկում  է ապրում․ դա օրինաչափություն է, ուստի Փաշինյանը բացառություն չի կազմում և չի կազմելու։ ՀՀԿ-ական նախկին պատգամավոր Մարգարիտ Եսայանն էլ  մեր թղթակցի հետ զրույցում խոսելով վարչապետ Նիկոլ Փաշինյանի վարկանիշի մասին՝ ընդգծեց՝ նրա վարկանիշը կտրուկ անկում է  ապրել։ «Նա այլևս վարկանիշ չունի․ իր կոչերը, հրահանգները հենց դրա մասին են խոսում։ Ամենաճիշտը հենց ինքն  գիտի, որ իր վարկանիշը կտրուկ անկում է ապրել, ուստի  կատարում է այդպիսի կացնային, կոշտ գործողություններ, կոշտ հայտարարություններ է անում։  Սա նրա  «կարապի երգ»-ի արտահայտությունն է, Փաշինյանի իշխանության վերջն է», -  նշեց Մարգարիտ  Եսայանը։ Նրա խոսքով՝ քաղաքական գործընթացներին հետևող ցանկացած քաղաքացի պարզ տեսնում է՝ Փաշինյանի իշխանությունը դառնում է բռնապետական իշխանություն․ դա պայմանավորված է նաև փաշինյանի անձի առանձնահատկությամբ։ «Գիտե՞ք՝ ժողովրդական մի լավ խոսք կա․  ասում են՝ մարդուն իշխանություն, պաշտոն տո՛ւր և փորձի՛ր, իհարկե, Հայաստանը փորձադաշտ չէ, և վստահ եմ՝ այս փորձությունը երկար չի տևի։ Միանշանակ, կարծում եմ՝ Նիկոլ Փաշինյանի իշխանությունը սահուն քայլերով գնում է դեպի բռնապետություն։ Մեր հասարակությունը պիտի շատ սթափ գնահատի այս իրավիճակը, իր խոսքն ասի, իր «ոչ»-ն ասի Փաշինյանին», -   ընդգծեց Մարգարիտ Եսայանը։