ԱԺ-ում այսօր հնարավոր եղավ ուշացումով քվորում ապահովել, մինչդեռ քվեարկության դրված նախագծերի մեծ մասը տապալվեց, քանի որ պատգամավորները չմասնակցեցին քվեարկությանը:
Մասնավորապես, քվեարկությանը չէր մասնակցում ՀՀԿ-ական պատգամավոր Գալուստ Սահակյանը, ում գրանցումից հետո հնարավոր եղավ ապահովել 53 պատգամավորի ներկայություն և նիստը մեկնարկեց:
Սահակյանը նախ չմասնակցեց «Պետական համակարգի մարմինների մասին» ՀՀ օրենքի նախագիծը երկրորդ ընթերցմամբ և ամբողջությամբ ընդունելու հարցի քվեարկությանը, որի արդյունքում 51 կողմ, 1 ձեռնպահ ձայներով նախագի]ը չընդունվեց: ԱԺ նախագահը ճշտեց Գալուստ Սահակյանից արդյոք նա քվեարկել է և տեխնիկական պատճառով քվեարկությունը չի գրանցվել, թե չի ցանկացել քվեարկել: Գալուստ Սահակյանը հաստատեց, որ չի քվեարկել:
Այնուհետև քվեարկության դրվեց «Ելքի» պատգամավոր Հրաչյա Հակոբյանի հեղինակած «Գովազդի մասին» ՀՀ օրենքում լրացումներ և փոփոխություններ կատարելու մասին» և «Շահումով խաղերի, ինտերնետ շահումով խաղերի և խաղատների մասին» ՀՀ օրենքում փոփոխություն կատարելու մասին» ՀՀ օրենքի նախագիծը, որով առաջարկվում է սահմանափակել շահումով խաղերի, ինտերնետ շահումով խաղերի, վիճակախաղի գովազդի հեռարձակումը հեռուստատեսությամբ, ռադիոյով և համացանցով: Այս խաղերի գովազդը նախագծի ընդունման դեպքում թույլատրվելու էր իրականացնել գիշերային ժամերին՝ 23:00-06:00-ը: Հրաչյա Հակոբյանը հորդորեց Գալուստ Սահակյանին այս անգամ մասնակցել քվեարկությունը և կարևորել օրենքի նախագծի ընդունումը:
