Իրանի արտգործնախարարն Աբբաս Արաղչին մեկնաբանել է ԱՄՆ նախագահ Դոնալդ Թրամփի խոսքերն, ըստ որոնց Իսլամական Հանրապետությունն, իբր, «ահաբեկչություն է սերմանում» Մերձավոր Արևելքում։
«Թրամփը վերահաստատել է ՝ առավելագույն ճնշման քաղաքականություն վարելու իր մտադրությունը։ ԱՄՆ նախագահը աչք է փակում տարածաշրջանում Իսրայելի բոլոր հանցագործությունների վրա և փորձում է Իրանին որպես սպառնալիք ներկայացնել։ Դա իսկական խաբեություն է և [հասկացությունների] նենգափոխում, երբ սպառնալիքները տեղերով փոխվում են։ Ո՞ր ռեժիմն է սպանել 60 հազար մարդու Գազայում։ Ո՞վ է նման մասշտաբի ավերածություններ պատճառել Գազայում։ Ո՞ր ռեժիմն է հարձակվում Պաղեստինի մերձակայքի, դրանց թվում՝ Լիբանանի, Սիրիայի և Եմենի վրա», -լրագրողներին ասել է Արաղչին։
«Սիրիական տարածքի այն տարածքը, որը վերջին ամիսներին օկուպացրել է սիոնիստական ռեժիմը, գերազանցում է Գազայի հատվածի ամբողջ տարածքը։ Սիոնիստական ռեժիմը Գազայում տնտեսական շրջափակման մեջ է պահում մի ամբողջ ազգի։ Այդ բոլոր փաստերն անտեսվում են, միաժամանակ փորձեր են արվում Իրանը ներկայացնել որպես տարածաշրջանի համար սպառնալիք, որպեսզի իրական սպառնալիքը մոռացվի։ Սակայն նրանք դրանում էլ հաջողության չեն հասնի»,-նշել է դիվանագետը։
Ըստ Իրանի արտաքին քաղաքական գերատեսչության ղեկավարի՝ «իրանական ժողովուրդն ընտրություն է կատարել ժողովրդավարական, անկախ և զարգացած երկրի օգտին, և հենց Միացյալ Նահանգներն է, որ տարիներ շարունակ պատժամիջոցների և ճնշման միջոցով խոչընդոտել է Իրանի առաջընթացը»։
