Ն.Ս.Օ.Տ.Տ. Գարեգին Բ. Ամենայն Հայոց Կաթողիկոսի խոսքը պարզապես լսում են եւ չեն դիտարկում քրեադատավարական ընթացակարգերի լույսի ներքո։ Այս մասին ֆեյսբուքյան իր էջում գրել է ՀՀ երկրորդ նախագահ Ռոբերտ Քոչարյանի պաշտպան Արամ Վարդեւանյանը։
Նա, մասնավորապես, գրել է.
«Ես ինձ իրավունք չեմ կարող վերապահել վերլուծելու Ն.Ս.Օ.Տ.Տ. Գարեգին Բ. Ամենայն Հայոց Կաթողիկոսի խոսքերը կամ որեւէ կերպ մեկնաբանելու այն: Իմ համեստ կարծիքով, Հոգեւոր Առաջնորդի խոսքը պարզապես՝ լսում են: Վեհափառ Հայրապետի խոսքը չեն դիտարկում քրեադատավարական ընթացակարգերի լույսի ներքո, առավելեւս, երբ քրեադատավարական իմաստով արդեն իսկ խոսվել է Եվրոպայի խորհրդի երկու բարձրագույն մարմինների կողմից՝ Խոշտանգումների կանխարգելման կոմիտեի եւ Մարդու իրավունքների հանձնակատարի կողմից: Ի դեպ՝ հենց այդ երկու մարմինների հրապարակային դիրքորոշումները ոչ միայն պարզապես վերաբերելի են ՀՀ երկրորդ նախագահ Ռոբերտ Քոչարյանի խափանման միջոցի փոփոխմանը, այլ հենց հստակ հիմնավորում են դրա անհրաժեշտությունը: Ես, Հայ Առաքելական եկեղեցու հետեւորդ եմ, հպարտ եմ մեր պատմությունով եւ տեղին է պարզապես նշել մեր Սահմանադրության 18-րդ հոդվածը. <<Հայաստանի Հանրապետությունը ճանաչում է Հայաստանյայց Առաքելական սուրբ եկեղեցու՝ որպես ազգային եկեղեցու բացառիկ առաքելությունը հայ ժողովրդի հոգեւոր կյանքում, նրա ազգային մշակույթի զարգացման եւ ազգային ինքնության պահպանման գործում>>: Որպես սահմանադրագետ՝ գտնում եմ, որ այս նորմը պետք է լինի Սահմանադրության ԱՆՓՈՓՈԽԵԼԻ հոդվածների շարքում»։
