Ըստ նախնական տվյալների՝ Իրանում ուկրաինական ուղևորատար Boeing-737 ինքնաթիռի կործանման հետևանքով զոհերի ցանկում ՀՀ քաղաքացիներ չկան։ Այս մասին ֆեյսբուքյան իր էջում գրել է ԱԳՆ մամուլի քարտուղար Աննա Նաղդալյանը։ Արտգործնախարար Զոհրաբ Մնացականյանը Twitter-ի իր միկրոբլոգում անդրադարձել է ինքնաթիռի կործանման միջադեպին ու ցավակցել զոհերի հարազատներին։ «Վատ նորություն Թեհրանից Կիև ուղևորվող Ուկրաինական ավիաուղիների Boeing 737 ինքնաթիռի վթարի մասին։ Խորին ցավակցություններս զոհերի ընտանիքներին ու ընկերներին»,-գրել է արտգործնախարարը։ Հիշեցնենք, որ Իրանի արտակարգ իրավիճակների վարչության ղեկավարը հաստատել է, որ Թեհրանի Իմամ Խոմեյնիի անվան միջազգային օդանավակայանի մոտ կործանված ուկրաինական օդանավի բոլոր 167 ուղևորները զոհվել են։ Flight Radar պորտալի հաղորդմամբ՝ ուկրաինական PS752 չվերթը Թեհրանից մեկնել է գիշերը ժամը 2:42-ին և դադարել տվյալներ փոխանցել երկու րոպե անց: Պորտալի տեղեկություններով՝ ուկրաինական Boeing 737-800-ը կործանվել է թռիչքից անմիջապես հետո: