ՀՀ ԱԺ արտահերթ նիստը այսօր մեկնարկեց բանավեճով։ ԱԺ նախագահ Արա Բաբլոյանը քվեարկության դրեց ՀՀԿ խմբակցության ղեկավար Վահրամ Բաղդասարյանը առաջարկեց առանց ընդմիջման աշխատել, մինչդեռ ընդդիմադիր խմբակցությունները դեմ արտահայտվեցին:
«Ելք» խմբակցության ղեկավար Նիկոլ Փաշինյանը բողոքեց ԱԺ աշխատանքների կազմակերպման ձևից՝ հայտարարելով, որ 35 օրենքից բաղկացած փաթեթը մեկ ժամային քննարկման է դրվում, իսկ արտահերթները առաց ընդմիջման հնարավորություն չեն տալիս քննարկել, թե ինչ առաջարկություններ են արվել նախագծերում կամ իրենց արված առաջարկներից որոնք են ընդունվել, որոնք՝ ոչ։
«Այս ընթացակարգով չենք հասցնում հասկանալ՝ ինչ է տեղի ունեցել նախագծերում։ Մենք դեմ ենք այս ընթացակարգին», - նշեց նա։
«Ծառուկյան» խմբակցության պատգամավոր Նաիրա Զոհրաբյանը համաձայնեց Փաշինյանի հետ՝ հայտարարելով, իրենք ևս դեմ են առանց ընդմիջման աշխատելու ռեժիմին։
«Մեր աշխատատեղն այստեղ է, և եթե ինչ-որ մեկը շտապում է, կարող է գնալ։ Մենք գտնում ենք, որ ընդմիջման ռեժիմները պետք է պահպանել և աշխատել մինչև օրակարգի սպառելը։ Որևէ հապճեպության խնդիր չենք տեսնում, ուստի մենք ևս դեմ ենք, որ ընդմիջումը հանվի», - նշեց Զոհրաբյանը։
ՀՀԿ խմբակցության ղեկավար Վահրամ Բաղդասարյանը շարունակեց պնդել, որ պետք է աշխատել առանց ընդմիջման ռեժիմի՝ նշելով, որ անհրաժեշտության դեպքում իրենք կարող են երկարացնել աշխատանքը և հավելյալ նիստ գումարել։
Ընդդիմադիրների բողոքը չընդունվեց։
Բաբլոյանը հայտարարեց, որ խորհրդարանը կաշխատի առանց ընդմիջման, իսկ հարցերի քննարկումից անմիջապես հետո դրանք կդրվեն քննարկման։ Նա կոչ արեց պատգամավորներին չլքել խորհրդարանի շենքը:
Irakanum.am
00:00:00
