Հունիսի 15-ին Գեղարքունիքի մարզպետ Իշխան Սաղաթելյանն ընդունեց «Երազանքի գյուղ» հասարակական կազմակերպության ներկայացուցիչներին, ովքեր արդեն մի քանի ամիս է, ինչ գործունեություն են ծավալել Գեղարքունիքի մարզի Դրախտիկ գյուղում զբոսաշրջությունն արմատավորելու և զարգացնելու ուղղությամբ: «Երազանքի գյուղ» կազմակերպության անդամները մարզպետին ներկայացրին իրենց առաքելության նպատակը և այն ծրագիրը, որն իրենք փորձում են կյանքի կոչել Դրախտիկում՝ ուղորդելով համայնքի բնակիչներին՝ օգտագործելու սեփական ռեսուրսներն ու գրավչությունները զբոսաշրջության զարգացման ոլորտում:
«Երազանքի գյուղ» հասարակական կազմակերպությունը ձևավորվել է 21 կամավորների համախմբման արդյունքում: Ծրագրի սկզբում երիտասարդները Դրախտիկ համայնքում համատեղ ուժերով գնել են մի բնակարան, վերանորոգել այն, վերածել «Օֆիս»- բնակարանի: «Հիմնեցինք «Երազանքի գյուղ» հասարակական կազմակերպությունը: Սկսեցինք աշխատել: Համախմբվեցինք մեկ գաղափարի շուրջ, գյուղը «դժոխքից դրախտ» տեղափոխելու նպատակով»,- նշեց հասարակական կազմակերպության ղեկավարը:
Երիտասարդ կամավորներն այնուհետև ուսումնասիրել են համայնքի կենսապայմաններն ու մարդկային ռեսուրսները, աշխատել յուրաքանչյուր գյուղացու հետ, նրանց սովորեցրել, թե ինչպես կարելի է զբոսաշրջիկի հետ առնչվել ու կազմակերպել պատշաճ սպասարկում:
Ողջունելով երիտասարդների նախաձեռնությունը՝ մարզպետ Իշխան Սաղաթելյանը ցանկություն հայտնեց՝ առաջիկայում անձամբ այցելել Դրախտիկ և տեղում ծանոթանալ ծրագրին:
«Ես խրախուսում եմ նման հետաքրքիր նախաձեռնությունները, ես ձեր կողքին եմ և պատրաստ եմ իմ լիազորությունների շրջանակներում աջակցել ձեզ՝ այս ձեռնարկում: Ճիշտ է, մեկ համայնքի օրինակը քիչ կարող է ազդել ողջ մարզի վրա, սակայն համոզված եմ, որ այդ գյուղը կարող է թելադրող լինել և շատ համայնքների իր հետևից տանել: Մեծ ցանկություն և ծրագրեր կան հատկապես Սևանի տարածաշրջանում ձմեռային տուրիզմի զարգացման համար, և ես կարծում եմ, որ այս ուղղությամբ ևս պետք է աշխատանքներ տանել ու հասնել ցանկալի արդյունքի»- նշեց Գեղարքունիքի մարզպետ Իշխան Սաղաթելյանը:
Կազմակերպությունը Դրախտիկում նախատեսում է իրականացնել նաև տուրիստական քայլարշավներ, ձիարշավներ, այլ նախաձեռնություններ՝ ձգտելով օգտագործել Դրախտիկի աշխարհագրական դիրքի գրավչությունները, որոնք առնչվում են Սևանա լճին և զբոսաշրջային ավանդներ և հաջողություններ ունեցող Կալավան համայնքին սահմանակից լինելու հետ:
«Երազանքի գյուղ» ՀԿ նախագահի տեղեկացմամբ՝ առաջիկայում սպասվում է ՄԱԿ-ի զարգացման ծրագրի ղեկավարի ներդրումային աջակցությունը՝ Դրախտիկում գյուղատնտեսության և զբոսաշրջության ոլորտների զարգացման ուղղություներում:
Գեղարքունիքի մարզպետարանի աշխատակազմի
տեղեկատվության և հասարակայնության հետ կապերի բաժին
00:00:00
