Տարածքային կառավարման և զարգացման նախարար Սուրեն Պապիկյանն այսօր ընդունել է Հայաստանում Կարմիր խաչի միջազգային կոմիտեի (ԿԽՄԿ) պատվիրակությանը` կոմիտեի ղեկավարի տեղակալ Նիմա Դադբինի ղեկավարությամբ: Պատվիրակության կազմում էին ԿԽՄԿ տնտեսական անվտանգության ծրագրերի համակարգող Մարգարիտա Վասիլիաուսկայտեն և առողջապահական ծրագրերի պատասխանատու Գեղամ Պետրոսյանը:
Ողջունելով պատվիրակության անդամներին՝ Սուրեն Պապիկյանը կարևորել է Հայաստանում ինչպես Ղարաբաղյան հակամարտության տարիներին, այնպես էլ այսօր սահմանամերձ բնակավայրերում ԿԽՄԿ-ի մարդասիրական առաքելությունը՝ միտված պատերազմից տուժած անձանց օգնության տրամադրմանը, տեղական ենթակառուցվածքների զարգացմանը, բնակչության շրջանում անվտանգ վարքագծի ձևավորմանը: «Սահմանամերձ բնակավայրերի անվտանգության ապահովման, անհետ կորածների վերադարձի ու հակամարտող կողմերում մարդասիրական իրավունքի պահպանման բնագավառում ԿԽՄԿ-ի դերակատարումը շատ էական է և նման խնդիրների լուծումն առանց այդ աջակցության հնարավոր չէր լինի իրականացնել»,-ասել է նախարարը` շնորհակալություն հայտնելով Տավուշի մարզում սահմանամերձ բնակավայրերում կոմիտեի կողմից իրականացվող ծրագրերի համար:
Շնորհավորելով նախարարին նշանակման կապակցությամբ՝ ԿԽՄԿ ղեկավարի տեղակալ Նիմա Դադբինը շնորհակալություն է հայտնել արագ արձագանքի և ընդունելության համար։ Դադբինը կարևորել է Տարածքային կառավարման և զարգացման նախարարության հետ հետագա համագործակցությունը` շեշտելով, որ ԿԽՄԿ-ի համար նախարարությունը կարևոր գործընկեր է հանդիսանում:
Հանդիպմանը պատվիրակության անդամները ներկայացրել են իրենց կողմից իրականացվող ծրագրերը։ Քննարկվել են, մասնավորապես, ԿԽՄԿ-ի կողմից Տավուշի մարզում բնակավայրերի անվտանգության բարձրացմանն ուղղված իրականացվող պաշտպանական ծրագրերը: Պայմանավորվածություն է ձեռք բերվել ձևավորված համագործակցութունն ակտիվացնելու ուղղությամբ:
2011 թվականից ի վեր՝ ԿԽՄԿ-ն սերտ համագործակցում է Հայաստանի տեղական իշխանությունների հետ՝ իրականացնելով զանազան ծրագրեր հայ-ադրբեջանական միջազգային սահմանի երկայնքով տեղակայված համայնքներում: ԿԽՄԿ-ն օգնում է սահմանամերձ համայնքներին բարելավել ջրի քանակը, որակը, ապահովում է հասանելիությունը բնակիչների համար՝ վերանորոգելով ենթակառուցվածքները, օգնում է գյուղերի բնակիչներին գտնել եկամուտի այլընտրանքային հնարավորություններ:
00:00:00
