Մասիսի համայնքապետ Դավիթ Համբարձումյանը շնորհավորական ուղերձ է հղել շրջանավարտներին, որում մասնավորապես ասված է.

«Սիրելի՛ շրջանավարտներ,

Հարգելի՛ ուսուցիչներ, ծնողներ,

Շնորհավորում եմ այս կարևորագույն և խորհրդանշական օրվա առթիվ։

Սիրելի՛ շրջանավարտներ,

Տոնական այս օրը, որը լի է հույզերով ու հիշողություններով, մաղթանքներով ու հրաժեշտի խոսքերով, ձեզ ուղեկցելու է ամբողջ կյանքի ընթացքում։

Դպրոցական վերջին զանգն այսօր հնչում է որպես կոչնակ` ազդարարելով մի նոր կյանքի սկիզբ։

Նվիրական այս օրը դուք հրաժեշտ եք տալիս հարազատ կրթօջախներին և սիրելի ուսուցիչներին, ովքեր տարիներ շարունակ անսպառ նվիրումով կրթել ու դաստիարակել են ձեզ, փոխանցել նաև հոգևոր֊բարոյական մնայուն արժեքներ, որոնք պետք է դառնան ուղեցույց նոր կյանքի ճանապարհին և ապագայի կերտման հիմնաքարը։

Սիրելի շրջանավարտներ,

Իմ պատանի բարեկամներ,

Հրաժեշտ տալով դպրոցական անհոգ տարիներին` դուք մտնում եք կյանքի նոր շրջափուլ, որտեղ հաղթահարելու եք բազում դժվարություններ:

Երբեք չնահանջեք դեպի ձեր նպատակների իրականացումը տանող ուղուց։

Քայլեք վստահ ու անվարան։

Հայրենիքի հանդեպ ունեցած սիրով ու նվիրումով` դարձեք մեր երկրի վաղվա լավ օրվա և նոր հաղթանակների կերտողները։

Բարի երթ ձեզ»։