Արցախի Հանրապետության կառավարության հետ համատեղ՝ «Ջենեսիս Արմենիա» գիտավերլուծական կենտրոն-հիմնադրամի և Ռուսաստանի Դաշնությունում գործող «Էկոպրոֆ» ընկերության նախաձեռնությամբ Արցախում գերժամանակակից խառատային և գործիքաշինական հաստոցներով հագեցած մետաղամշակման, վերանորոգման և ուսումնական արտադրամաս կհիմնադրվի:
«Արցախպրես»-ի թղթակցի հաղորդմամբ՝ այսօր՝ հոկտեմբերի 29-ին, ԱՀ կառավարությունում տեղի է ունեցել արտադրամասի նախագծի շնորհանդեսը, որից հետո Արցախի Հանրապետության պետական նախարար Արտակ Բեգլարյանի և «Ջենեսիս Արմենիա» հիմնադրամի տնօրեն Աբրահամ Գասպարյանի միջև համագործակցության հուշագիր է ստորագրվել:
«Շուրջ 200 միլիոն դրամի գումարի չափով կներդրվեն արդիական հաստոցներ: Բնականաբար կկազմակերպվեն նաև վերապատրոստումներ՝ և առաջին փուլլում, և շարունակաբար: Արցախի կառավարության կողմից կտրամադրվեն անհրաժեշտ ենթակառուցվածքը, շենքը՝ համապատասխան պայմաններով: Այն նպատակ ունի աշակերտների մոտ հետաքրքրություն առաջացնել տեխնիկական և արհեստագործական մասնագիտությունների և հատկապես խառատային հաստոցագործության գործիքաշինության հանդեպ»,-ասել է Արտակ Բեգլարյանը՝ համոզմունք հայտնելով, որ այս ներդրումը երկարաժամկետ մեծ նախագծի հիմք է հանդիսանալու:
Պետնախարարի խոսքով՝ «Ջենեսիս Արմենիա»-ն և «էկոպրոֆ»-ը լուրջ օրինակ են ծառայում, որ Արցախում հնարավոր է նման՝ և բիզնես, և բարեգերծական, ինչպես նաև հայրենասիրական ներդրում կատարելով, նաև բիզնես շահույթ ունենալ ու բավականին լուրջ ռազմավարական, սոցիալական, կրթական նշանակության արդյունք ապահովվել:
«Ջենեսիս Արմենիա»-ի տնօրեն Աբրահամ Գասպարյանի հավաստմամբ՝ ուղեղային կենտրոն-հիմնադրամն աշխարհում ունենալով շուրջ 3000 գերպրոֆեսիոնալ հայրենակիցների ներուժ, պատրաստ է այն ճիշտ գործածել, որպեսզի Արցախում կերտվի հայկական պետության այն մոդելը, որը շատ բաղձալի է:
«Հետպատերազմյան Արցախի տեխնոլոգիական և տեխնիկական ամենամեծ ներդրումն է սա, որն օր առաջ պետք է իրականացնել, անկախ ամեն ինչից: Այս նախագծում ամենաառաջինը, որ ուղենշային ու առաջնորդող է և միաժամանակ ընկած է մեր գործունեության հիմքում, կրթությունն է: Մենք պիտի կրթվենք, ընդ որում՝ ոչ միայն ժամանակակից, այլ նաև՝ գերժամանակակից մեթոդներով»,-ասաց Աբրահամյանը:
Ինչպես ներկայացվեց նախագծի շնորհանդեսին՝ մետաղի մշակման արտադրամասի կամ տեխնոպարկի շահագործմաբ լուծվելու են կարևոր խնդիրներ տարբեր բնագավառներում: Մասնավորապես՝ կիրականացվեն գյուղտեխնիկայի և մեքենաշինական սարքավորումների նորոգում, տրանսպորտային միջոցների մետաղական մասերի մշակում, ինչպես նաև ցանկացած կարծրության մետաղի վերամշակում և այլն :
