Սյունիքը մեր կարիքն ունի։ Սյունիքը թշնամուց պետք է փրկենք: Արյունով պահած հայրենիքի 75 %֊ը թշնամուն նվիրաբերած կառավարությունը միտք ունի այսօր Սյունքը դնել թշնամու զոհասեղանին։ Ավելին՝ այդ մասին վարչապետի աթոռը զբաղեցնող անձը խոսում է երկրի թիվ մեկ ամբիոնից:

Սա մի սահմռկեցուցիչ երազ է հայ ժողովրդի համար, երբ Արցախն ու Սյունիքը ոչ թե թշնամուց, այլ «հայից» պետք է և պարտավոր ենք պաշտպանել:

Բայց մենք իրավունք չունենք դա թույլ տալու, ինչպես իրավունք չունենք թուլանալու և մեր երեխաներին անհայրենիք թողնելու։

Հայ ժողովրդի պատմության մեջ ծայրահեղ ժամանակաշրջանի այս պատասխանատու պահին պետք է համախմբվենք, ոտքի կանգնենք ու փրկենք Սյունիքը թշնամուց։

Սյունեցին դեռ 100 տարի առաջ կարողացել է ընդդիմանալ թուրքական 15 000֊անոց բանակին, սյունեցին իր ասելիքն ասել է Արցախյան բոլոր պատերազմների ժամանակ։ Այսօր կրկին հասունացել է պահը, և անհրաժեշտ է Սյունեցու վճռորոշ քայլը։ Թույլ չենք տալու Սյունիքն էլ արժանանա Արցախի ճակատագրին։

Դիմում եմ ազգային արժանապատվություն ունեցող, Հայրենիքի ազատությունն ու անկախությունն ամեն ինչից վեր դասող հայերին և մասնավորապես՝ սյունեցիներին.

Համախմբված ելեք ոտքի, պայքարեք հանուն մեր վաղվա օրվա, հանուն մեր երեխաների և հանուն Սյունիքի։

Սա վաղուց այլևս քաղաքական պայքար չէ, սա պաշտոնի ու աթոռի կռիվ չէ, սա գոյության խնդիր է, լինելու և չլինելու խնդիր է:

Ոչ մի տեղ առանց Սյունիքի ու Արցախի: Առանց Հայաստանի աշխարհագրական այդ հզոր ողնաշարի մեր ամբողջական հայրենիքը գոյություն ունենալ չի կարող։

Հիշե՛ք, մեր անունը պայքար է, մեր վերջը՝ հաղթանակ։

Ոտքի՛ ել ըմբոստ սյունցեի, ոտքի՛ ել ըմբոստ հայ։

Աստված է մեր արդար պայքարի առաջնորդը:

Կհանդիպենք...