«Քաղաքացիական պայմանագիր» կուսակցության անդամ, պատգամավոր Էմմա Պալյանը ֆեյսբուքյան իր էջում գրառում է արել, հերքելով մամուլում հրապարակված տեղեկություններն այն մասին, որ Գյումրու ՏԻՄ ընտրությունների գիշերը ՔՊ-ականների միջև ծեծկռտուք է տեղի ունեցել։

«ՔՊ նախընտրական շտաբում ՈՉ մի միջադեպ, ծեծկռտուք չի եղել ընտրությունների օրը, ինչի մասին արդեն 2 օր է տարբեր լրատվամիջոցներ գրում են։ Գյումրու ՔՊ թիմը, ինչպես միշտ, եղել և շարունակում է լինել միասնական, ասեմ ավելին՝ նման հրապարակումներն էլ ավելի են մեզ դարձնում միասնական…Շարունակեք նույն ոգով»,- գրել է պատգամավորը։

 Հիշեցնենք, որ «Հրապարակ» թերթը գրել էր․  «Գյումրիի ընտրություններում պարտվելուց հետո Գյումրու ՔՊ-ի շտաբում վիճաբանություն եւ ծեծկռտուք է եղել։ Սկսել են միմյանց մեղադրել պարտության համար, հարձակվել են իրար վրա, անգամ հայհոյանքներ ու ծեծկռտուք է եղել: Վիճել են հատկապես ՔՊ քաղաքապետի թեկնածու Հովհաննես Հարությունյանն ու նախկին մարզպետ, այժմ ԱԻ փոխնախարար Կարեն Սարուխանյանը: