Թուրքիան ոչ միայն չի հրաժարվում իր նախապայմաններից, այլև ավելացնում է դրանք։ Հիմա որպես չորրորդ նախապայման հանդես են գալիս Զանգեզուրի միջանցքի խնդրով։ «Փաստինֆո»-ի հետ զրույցի ժամանակ այս մասին ասաց թուրքագետ Ռուբեն Սաֆրաստյանը։ Վերջինս հույս հայտնեց, որ Հայաստանի ոչ մի կառավարություն չի ընդունի Թուրքիայի նախապայմանները։ Թուրքագետի խոսքով՝ Թուրքիան Հայաստանի հետ հարաբերությունները կարգավորելու ուղղությամբ որևէ քայլ չի անում։ «Հայաստանի հետ հարաբերությունները կարգավորելու ցանկություն Թուրքիայի մոտ դեռ չեմ տեսնում։ Այս պայմաններում Թուրքիայի հետ ընդհանուր եզրեր գտնելն անիմաստ է և ոչ մի օգուտ մեզ չի տա։ Միևնույն է՝ նրանք անելու են այն, ինչ ուզում են»,-ասաց Ռուբեն Սաֆրաստյանը։ Նրա խոսքով Հայաստանի նկատմամբ Թուրքիայի մոտեցումը հիմնվում է 2 փաստաթղթի վրա. առաջինը դա 1918 թվականի Բաթումի պայմանագիրն է, որի համաձայն Հայաստանը դարձել էր վասալ պետություն, իսկ երկրորդ փաստաթուղթը, Ռուբեն Սաֆրաստյանի, խոսքով գաղտնի հրամանն է, թուրքական զորքերն ագրեսիվ պատերազմի ժամանակ պետք է Հայաստան մտնեն։ «Այդ երկու մոտեցումն է, որ Թուրքիայում կա Հայաստանի նկատմամբ։ Կա՛մ դարձնեն վասալ պետություն, կա՛մ էլ Հայաստանը վերացնեն։ Նրանք չեն հրաժարվելու իրենց նախապայմաններից և մեզ չեն ընկալելու որպես հավասար։ Նրանք հնարավորինս մեզ ճնշելու են, նոր զիջումներ են կորզելու»,-նշեց Ռուբեն Սաֆրաստյանը։ Թուրքագետը կարծում է, որ մեր հայտարարություններում շատ ավելի հստակ պետք է բացահայտենք բոլոր այն հանցագործությունները, որոնք իրականացվել են Ադրբեջանում Արցախի ժողովրդի նկատմամբ։ Պետք է ցույց տանք, որ Ադրբեջանն իրականացրել և իրականացնում է ցեղասպանություն։ Այսինքն` Ադրբեջանը կրկնում է այն քաղաքականությունը, որն իրականացրեց Թուրքիան հայոց ցեղասպանության ժամանակ Արևմտյան Հայաստանում՝ յուրացնելով Արևմտյան Հայաստանը։ «Սա ոչ միայն Թուրքիայի օգնությամբ է, այլ Թուրքիայի ղեկավարությամբ։ Թուրքիան հանդես է գալիս որպես Ադրբեջանին ուղղորդող, որովհետև Ադրբեջանը Թուրքիայից սովորում է ցեղասպանության քաղաքականություն իրականացնել։ Պետք է ամենատարբեր հնարավորություններն օգտագործելով Ադրբեջանի քաղաքականության մասին այդ ճշմարտությունը հասցվի աշխարհին»,-նշեց թուրքագետը։։ Այժմ Թուրքիան ու Ադրբեջանը գնում են Զանգեզուրի միջանցքը ստանալու ճանապարհով։ Ռուբեն Սաֆրաստյանի խոսքով, եթե նրանք կարողանան դա ստանալ, նշանակում է՝ մի կողմից Թուրքիան հնարավորություն է ստանում Ադրբեջանին էլ ավելի զինել զենքով, զորքերն արագ տեղափոխել Ադրբեջան, իսկ մյուս կողմից հնարավորություն է ստանում շատ արագ հասնել Կասպից ծով, ինչը կփոխի Կասպից ծովի ամբողջ իրավիճակը։ «Պատահական չէ, որ Իրանը դրան կտրուկ դեմ է։ Այսինքն` այդ միջանցքը Թուրքիայի համար շատ կարևոր ռազմավարական նշանակություն ունի։ Մյուս կողմից էլ այդ միջանցքը կարևոր նշանակություն ունի նաև տարածաշրջանի առումով, որովհետև դա Իրանին կտրում է Հայաստանից»,-եզրափակեց Ռուբեն Սաֆրաստյանը։