ԱԺ ԲՀԿ խմբակցության պատգամավոր Նաիրա Զոհրաբյանը իր ֆեյսբուքյան էջում գրում է.
«124 քննիչ Ծառուկյանի վրա կենտրոնացնելու փոխարեն մի քանիսին «սամավոլկա» տվեք, որ զբաղվեն կորոնավիրուսից մահացած մարդկանց մեղավորներով։
Հայաստանը կորոնավիրուսի վարակակիրների թվով աշխարհի չեմպիոններից է, յուրաքանչյուր օր հարյուրավոր մարդիկ դառնում են վարակակիր ու էդ էլ էն դեպքում, երբ օրական արվում է մոտ 2000 թեսթ: Կարծում եմ ՝ հասկացաք, որ եթե օրական 3000 կամ 4000 թեսթ արվի` վարակակիրների ինչ դաժան թվեր ենք ունենելու: 553 մահ կորոնավիրուսից, բայց դա չի խանգարում, որ առողջապահության նախարարը հպարտ լինի: Փաստորեն, ունենալով կորոնավիրուսային խայտառակ իրավիճակ, տնտեսության ջախջախիչ անկում, Հայաստանի իշխանությունը շարունակում է աննախադեպ հպարտ և վճռական լինել: Բայց, ոչ թե կորոնավիրուսի դեմ պայքարում, այլ քաղաքական այլախոհների և իրենց չծափահարողների դեմ պայքարում: 124 քննիչ միանգամից լծված է Գագիկ Ծառուկյանի դեմ գործ կարկատելու պրոցեսին:
Պետական բյուջեից հսկայական գումարներ են ծախսվում տարբեր ռեյդերի, մեր և մեր հարյուրավոր թիմակիցների վրա 24 ժամ «սլեժկա» կազմակերպելու վրա, պեղելու մադկանց ու նրանցից խուճուճ հարցադրումներով փորձելու իրենց ուզած բառը պոկել: Բայց, դա էլ կապ չունի. կարևորը, իշխանությունը շարունակում է հպարտ լինել, որ մինչ այս պահը կորոնավիրուսից մահացել է ընդամենը 553, այլ ոչ թե մի քանի հազար մարդ: Բայց կարո՞ղ էինք չէ բոլորս մեռնել ու մնային միայն նրանք, ովքեր ընդունում են հեղափոխության արժեքները: Իհարկե կարող էինք: Էդպիսի մի կրոնական աղանդ կար, որի հետևորդները վստահ էին, որ հենց եկավ աշխարհի վերջը, բոլորը նահատակվելու են, իրենցից բացի:
Էնպես որ, սա անվճար PR գաղափար` իրենց բացառիկ ու ընտրյալ լինելու թեզը, օվերտոնի պատուհանի սկզբունքով ծամելու համար:
Իտալիայի վարչապետը շարունակում է կանչվել հարցաքննության` այդ երկրում կորոնավիրուսի դեմ պայքարը տապալելու և ճիշտ ժամանակին անհրաժեշտ քայլեր չանելու համար։ Բազմաթիվ փորձագետներ կանխատեսում են, որ նա կենթարկվի քրեական պատասխանատվության:
Իսկ որ նաև Հայաստանում իր բաժին պատասխանատվությունից որևէ մեկը չի խուսափելու ու դա ընդամենը ժամանակի հարց է, կարծում եմ, անգամ ամենաանհույս ինֆանտիլները ևս չեն կասկածում:
Ու «անպատասխանատու» ժողովրդի վրա մեղքը գցելու շոուները չեն անցնելու: Չկա մարդ, որ դիմակ չկրի և անգամ էս ամենադաժան շոգին ինձ չի հանդիպել անդիմակ քաղաքացի, ինչի համար խոնարհումս մեր հայրենակիցներին:
Առաջարկս շատ պարզ է` էն 124 քննիչին, որ տնից, տեղից, բասեյինից կտրել ու Ծառուկյանի վրա ընտրակաշառքի գործ պեղելու պրոյեկտին եք կցել, մի քանիսին «սամավոլկա» տվեք ու թող էդ քննիչները զբաղվեն, օրինակ, թե իրականում քանի՞ դեպք է եղել, որ հիվանդին շտապօգնության մեքենաները հրաժարվել են տեղափոխել հիվանդանոց ու մարդիկ մահացել են, թող զբաղվեն, թե ինչու՞, երբ մարդիկ էին մեռնում, իշխանությունը հրաժարվում էր օգտագործել կոնկրետ հիվանդանոցների ռեսուրսը, թող զբաղվեն, թե հենց հիմա ի՞նչ է կատարվում տնային պայմաններում բուժվող հիվանդների հետ, որոնց բացի պարետատան մեկ զանգից, որը ֆիքսում է հիվանդների վարակված լինելու փաստը, էդ մարդկանցով որևէ մեկը հետո ընդհանրապես հետաքրքրվու՞մ է, թե` ոչ:
Թող զբաղվեն, թե ինչի՞ վրա են ծախսվում COVID-19 հիմնադրամի գումարները, երբ տնային պայմաններում բուժվող մեր հարյուրավոր հայրենակիցներ բավականին թանկարժեք դեղերի գումարների խնդիր ունեն: Սրանք հարցեր են, որոնց պատասխանները մի օր պիտի տրվեն, ու որևէ մեկդ էդ հարցերի պատասխաններից ու իր բաժին պատասխանատվությունից չի խուսափելու, եթե անգամ մինչև դեկտեմբեր, ինչպես սպառնում են, երկարաձգեն արտակարգ դրությունը:
Հա, էսօր մի թեթև էլ անդրադառնամ պոնչիկ թխող, զոնտիկ պահող ու նրանց ընկեր խոշոր գործարարների, ովքեր իշխանության հրահանգով իրենց աշխատողներին, ըստ օդում կախված հավաստի լուրերի, աշխատանքից հեռացնելու սպառնալիքով ստիպում են մեր դեմ անբարո գրառումներ անել:
Ուրեմն իմացեք պոնչիկ թխողներ ու զոնտիկ պահողներ, որ բոլոր իշխանությունների ստրկահպատակն եք եղել, ձեր հավաքական համույթին չի փրկելու անգամ մեզ մոտ գործուղված ձեր եվնուխների լացը, թե այլ տարբերակ չունեք ու պարզապես այս իշխանության պատանդն եք: Դուք վաղուց արդեն տառապում եք պատանդներին բնորոշ ստոկհոլմյան սինդրոմով ու ձեր արած այլանդակություններին կանդրադառնամ առանձին: Էսօր էսքանը ձեր մասին»:
