Մենք քաղավիացիայի ոլորտում տիրող իրավիճակի մասին իմացել ենք ՄԱԿ-ի անվտանգության խորհրդի զգուշացումից հետո: Այս մասին, այսօր՝ ապրիլի 15-ին ԱԺ-ում կառավարության հետ հարցուպատասխանի ժամանակ նշեց ՀՀ վարչապետ Նիկոլ Փաշինյանը: «Լուսավոր Հայաստան» խմբակցությունից Կարեն Սիմոնյանը իր հարցը հնչեցնելիս նշեց. «Քաղավիացիայի կոմիտի ղեկավարն իր երեկվա ասուլիսում ասաց, որ եղել են բազմաթիվ խնդիրներ, իրեն չեն հասցրել ճիշտ ինֆորմացիա: Ո՞վ է պատասխան կրելու այս ամենի համար, արդյոք գնահատվել է վնասը եւ որքան ժամանակում կվերականգնվի նախկին վիճակը»: Ի պատասխան Նիկոլ Փաշինյանը նախ ընթերցեց Հաշվեքննիչ պալատի կողմից 2019-ի աշնանը իրեն տրված տեղեկանքից մի հատված. «2018-ի հոկտեմբերի 1-ի դրությամբ ՀՀ-ում գրանցված 28 օդանավերից 18-ը բազավորված են Հայաստանից դուրս, որից 10-ը աֆրիկյան երկրներում՝ Հարավային Սուդան, Չադ: Աֆրիկյան երկրներում բազավորված օդանավերը հիմնականում իրականացնում են բեռնափոխադրումներ: Ավիացիայի վարչությունը պարբերաբար ՀՀ ԱԳՆ-ի միջոցով ՄԱԿ-ից ստացել է անվտանգության խորհրդի բանաձեւերի կատարման գրություններ: Ներկայացվել են նաեւ տեղեկատվություններ, որ ՀՀ-ում գրանցված օդանավերը ֆրիկյան երկրներում ներգրավված են զենքի անօրինական փոխադրումներում: Գրությունները կցվում են»: Այնուհետեւ վարչապետը շարունակեց. «Ի՞նչ է տեղի ունեցել. տեղի է ունեցել հետեւյալը, որ Եվրոպական համապատասխան հանձնաժողովը արձանագրել է, որ ՀՀ Քաղավիացիայի կոմիտեն չի կարողանում վերահսկել ավիաընկերությունների գործունեությունը ՀՀ-ում, եւ դա մեկնաբանությունների տեղիք է տալիս: Այս տեղեկանքում ներկայացված է նաեւ, թե ինչու չի կարողանում վերահսկել, որովհետեւ ՀՀ Քաղավիացիայի կոմիտեն Աֆրիկայում բազավորված օդանավերի նկատմամբ ունի պարտավորություններ, բայց մեր կարգավորումներով չունի լծակներ այդ պարտավորությունները կատարելու: Դրա արդյունքում տեղի են ունեցել մի շարք զարգացումներ»: Փաշինյանը նաեւ մեկ այլ դրվագ ներկայացրեց. «2019-ի աշնանը եվրոպական կազմակերպությունը ստուգել է հայաստանյան ավիաընկերություններից մեկը եւ դրա մասին նախնական նախազգուշական տեղեկանք է ուղարկել Քաղավիացիայի կոմիտե: ՔԱԿ-ի պաշտոնյան, որ պարտավոր էր ի պաշտոնե անմիջապես զեկուցել  ՔԱԿ-ի ղեկավարին (Տաթեւիկ Ռեւազյանին), չի զեկուցել, եւ վերջինս դրա մասին իմացել է երկու ամիս հետո Եվրոպայում տեղի ունեցած մի քննարկման ժամանակ: Այդ մասին նրան տեղյակ են պահել եվրոպացի կոլեգաները: Երբ պարզաբանումների պրոցես է սկսվել, այդ աշխատողն ազատվել է աշխատանքից եւ գործնականում մի քանի օրից հետո աշխատանքի է անցել այն ավիաընկերությունում, որը ստուգվել է եւ որտեղ խախտումներ են արձանագրվել: Երկու քրգործ կա: Ես հիմա բովանդակությունը անգիր չեմ հիշում, բայց որքան գիտեմ մեկը կապված է այս պատմության հետ: Բացի այդ, ՔԱԿ-ում այս տարվա սկզբից եղել են պաշտոնանկություններ»: Ինչ վերաբերում է լուծումներին, Նիկոլ Փաշինյանը նշեց. «Ամբողջ աշխարհում ավիացիայի համար լիցենզիաներ տրվում են վճարովի հիմունքներով: ՀՀ քաղավիացիան իր գործառույթներն իրականացնում է անվճար, քանի որ նա պետական կառավարման համակարգում ունի այդպիսի կարգավիճակ, որ չի կարող վճարովի գործունեությունը իրականացնել: Հիմա լուծումներից մեկն այն է, որ ՔԱԿ-ի կարգավիճակը փոխվի այնպես, որ ինքնածախսածածկվող կառույց կլինի, որ ունենա ֆինանսներ պատշաճ մասնագետներ ներգրավելու եւ իր լիազորությունները կատարելու լծակներ ստանալու համար»: