Պրոդյուսեր Ռուբեն Մխիթարյանը ՀՀ վաստակավոր արտիստ Հայկոյի մասնակցությամբ տեսանյութ է հրապարակել:

«Այս տեսանյութը հրապարակում եմ առաջին անգամ: Այն չեն տեսել նույնիսկ տեսանյութի մասնակիցները: 2013 թվականին «Հայաստանի ձայնը» նախագծի 2-րդ եթերաշրջանի «Կույր լսումներ» փուլի նկարահանումների վերջին՝ 5-րդ օրն էր: Բոլորս հոգնել էինք և նկարահանումները ընթանում էին շատ ծանր: Ես այդ ժամանակ «Արմենիա TV»-ի գլխավոր պրոդյուսերն էի:

Նախագծի գլխավոր ռեժիսոր՝ Հրաչ Քեշիշյանի հետ քննարկում էինք անցած մասնակիցների ձայնային տվյալները և հնարավորությունները ու վստահ պնդում էինք, որ «կույր լսումներում» շատ բան կախված է, թե ինչ երգ ես ընտրում և ձայնի ինչ տեմբրով ես կատարում:

Խոսակցությանը միացավ նախագծի երաժշտական պրոդյուսեր Իրինա Վարդանյանը, որը այդքան էլ համաձայն չէր մեր հետ և Հրաչի ներկայությամբ մենք գռազ եկանք իրար հետ, որ եթե ես դուրս գամ և երգեմ՝ մարզիչների գոնե կեսը պտտվելու են, առանց իմանալու, թե ով է երգում…

Հայկո ջան, դու այնպես արեցիր, որ բոլորդ շրջվեցիք… Միքայել Պողոսյանի կոճակը վերջում դու սեղմեցիր…

Դու ինձ ծափահարում էիր այդ օրը… Ես քեզ ծափահարել ու ծափահարելու եմ միշտ… Բարի ու բոլորի հաջողություններով ուրախացող, ջիգյարով տղա, ղայդով տղա… Բարով մնաս…»,-տեսանյութին կից գրել է Մխիթարյանը:

Երեկ հարազատները, ընկերները, գործընկերներն ու երկրպագուները «Վերև» ստեղծագործության հնչյունների ներքո վերջին հրաժեշտը տվեցին ՀՀ վաստակավոր արտիստ, երգիչ, երգահան Հայկոյին (Հայկ Հակոբյան):

Հայկոն կյանքից հեռացել է սեպտեմբերի 29-ին: Նա շուրջ մեկ շաբաթ հիվանդանոցում պայքարում էր կորոնավիրուսի հիվանդության դեմ:

facebook sharing button
messenger sharing button
skype sharing button
pinterest sharing button