Այս պահին իրավիճակը համեմատաբար հանգիստ է, կրակոցները դադարել են, բայց մոտ մեկ ժամ առաջ ինտենսիվ կրակում էին Սոթքի ոսկու հանքի ուղղությամբ: Այս մասին NEWS.am-ի հետ զրույցում հայտնեց Գեղարքունիքի մարզի Գեղամասար խոշորացված համայնքի ղեկավար Հակոբ Ավետյանը:

«Արդեն թեթև կրակոցները սովորական են դարձել՝ ոչ բնակիչներն են ահազանգում, ոչ՝ ես, անընդհատ են դրանք, միայն ուժեղ կրակոցների ժամանակ ենք սկսում անհանգստանալ ու ահազանգել»,- նշեց համայնքապետը:

Ավետյանի խոսքով՝ հակառակորդը թիրախավորում է հենց խաղաղ բնակավայրերը:

«Մարդկային կորուստներ չունենք, բայց գնդակոծության հետևանքով, հնարավոր է, տների տանիքները վնասված լինեն, կարող է կրակոցներից հենց գյուղացի սպանվեր, իսկ հառակորդը հենց սպանելու, խուճապ առաջացնելու նպատակ ունի»,- նշեց Ավետյանը: