«Իմ քայլի» պատգամավորներից ոմանք հայտարարում են՝ գնացեք ՌԴ դեսպանի մոտ և թող նա դիմի ՌԴ նախագահին՝ հայ գերիների հարցով, սա անթույլատրելի է: Այ ս մասին ԱԺ-ում հայ ռազմագերիների վերադարձի թեմայով աշխատանքային քննարկման ժամանակ ասաց Արցախի նախագահի հատուկ ներկայացուցիչ Բորիս Ավագյան.

«Եթե պատգամավորն իրեն թույլ է տալիս իր քաղաքացիներին ուղղորդել օտարերկյա դեսպանի մոտ , որ դեսպանն էլ զեկուցի իր երկրի նախագահին, ուրեմն նա ոչ կոմպետենտ է և իր տեղում չէ: Ավելի լավ է նրանք ելույթ չունեն, որովհետև կվնասեն իրենց քաղաքական թիմին»,-ասաց Բորիս Ավագյանը:

Վերջինս նշեց, որ պատգամավորների և պաշտոնյանների հայտարարությունները, որոնք հայ գերիների վերադարձի հարցում սլաքներն ուղղում էին դեպի ՌԴ և ռուս խաղաղապահ զորքերի հրամանատար Մուրադովը, խանգարում ենբ հայ գերիների վերադարձին.

«Եթե դու ունես ռազմական դաշնակից, որն օգնում է քեզ ամեն ինչով և, որպես իշխող քաղաքական ուժ, թույլ ես տալիս, որ պետական աշխատողները համարձակվեն վիրավորել այդ դաշնակցի պետական այրերին, դա դժվարացնում է գերիների վերադարձի գործընթացը, որովհետև այն մարդիկ, որոնք իրենց բոլոր ջանքերը գործադրում են, որ օգնեն մեզ, ստանում են այդպիսի վերաբերմունք, իսկ իշխող ուժից ոչ մեկը չքննադատեց»,-ասաց Բորիս Ավագյանը:

Վերջինս պարզաբանեց, որ հայ գերիների ինքնաթիռը Բաքվից դատարկ վերադարձավ, քանի որ չէր գնացել գերիների ետևից, այլ Մուրադովը գնացել էր աշխատանքային այցով, սակայն ինչ -որ մարդիկ մտածել են կամ հույս են ունեցել, որ գերիներ պետք է վերադառնան: