Բելառուսի Հանրապետության Նախագահ Ալեքսանդր Լուկաշենկոն այս շաբաթ բանակցություններ կվարի Ադրբեջանի նախագահ Իլհամ Ալիևի հետ: Այս մասին հայտարարել է «Пул первого» Telegram ալիքը: Հիմնական բանակցությունները նախատեսված են չորեքշաբթի:

«Այս շաբաթ Լուկաշենկոն մեկնում է Ադրբեջան: Ալիևի հետ բանակցությունների հիմնական մասը նախատեսված է չորեքշաբթի», — գրել են ալիքի հեղինակները:

Նախատեսված է երկու հանդիպում. առաջինը` Բաքու ժամանելուն պես, իսկ հիմնականը` չորեքշաբթի: Ալեքսանդր Լուկաշենկոն ապրիլի 13-ին պետք է մեկնի Ադրբեջան:
Բանակցությունները կանցկացվեն նեղ և ընդլայնված ձևաչափով:

Կքննարկվեն արդյունաբերական համագործակցությունը, սննդի ոլորտում իրականացվող ծրագրերը, առողջապահության, գիտատեխնիկական, կրթության և զբոսաշրջության ոլորտներում համագործակցությունը:

Անցյալ տարի Ադրբեջանը դարձել է Բելառուսի այլընտրանքային նավթի հիմնական աղբյուրներից մեկը` ռուսական խոշոր ընկերություններին հումքի մատակարարումների դադարեցման ֆոնին:

Մատակարարվել է շուրջ 1 միլիոն տոննա նավթ: Այս տարի Ադրբեջանից հումքի գնումները շարունակվել են: