89 տարեկանում կյանքից հեռացել է ՀՀ ժողովրդական արտիստ, թավջութակահարուհի Մեդեա Աբրահամյանը: Անվանի արվեստագետի մահվան կապակցությամբ ստեղծվելու է թաղման կառավարական հանձնաժողով, տեղեկացնում է ՀՀ ԿԳՄՍՆ հասարակայնության հետ կապերի և տեղեկատվության վարչությունը:

ՀՀ կրթության, գիտության, մշակույթի և սպորտի նախարարությունը ցավակցում է  Մեդեա Աբրահամյանի ընտանիքի անդամներին ու մերձավորներին: ՀՀ ժողովրդական արտիստի հիշատակը միշտ վառ կմնա մեր սրտերում:

Կենսագրություն

Մեդեա Աբրահամյանը ծնվել է 1932 թվականի մարտի 8-ին Երևանում: Սովորել է Երևանի Պ. Չայկովսկու անվան երաժշտական դպրոցում, 1956 թ. ավարտել է Մոսկվայի Պ. Չայկովսկու անվան պետական կոնսերվատորիան` Մստիսլավ Ռոստրոպովիչի դասարանը:

1956 թ.-ից աշխատել է Հայաստանի պետական ֆիլհարմոնիայում՝ որպես մենակատար, 1957 թ.-ից դասավանդել է Երևանի Պ. Չայկովսկու անվան երաժշտական 10-ամյա դպրոցում, 1960 թ.-ից՝ Երևանի Կոմիտասի անվան պետական կոնսերվատորիայում (1981 թ-ից` պրոֆեսոր):

Նա եղել է հայ կոմպոզիտորների բազմաթիվ երկերի առաջին կատարողը: Մենահամերգներով հանդես է եկել Ռումինիայում, ԱՄՆ-ում, Ֆրանսիայում, Իսլանդիայում, Արգենտինայում, Սիրիայում, Լիբանանում, Կորեայում, խորհրդային հանրապետություններում և այլուր: Արժանացել է Բուլղարիայի Ռուսե քաղաքի պատվավոր քաղաքացու կոչման:

1955 թ. Պրահայի Վիհանի անվան թավջութակահարների միջազգային մրցույթի ժամանակ արժանացել է 2-րդ մրցանակի և դարձել դափնեկիր: 1973 թ. պարգևատրվել է ՀՀ պետական մրցանակով: 1963 թ. արժանացել է Հայաստանի վաստակավոր, 1980 թ.՝ ժողովրդական արտիստի կոչման: 2012 թ. պարգևատրվել է «Հայրենիքին մատուցած ծառայությունների համար» 1-ին աստիճանի մեդալով: