SHAMSHYAN.com-ի տեղեկություններով, Հայաստանի քննչական կոմիտեի Երևան քաղաքի քննչական վարչությունում նախաքննություն է սկսվել ՀՀ Ազգային անվտանգության ծառայության համապատասխան վարչության կողմից ստացված օպերատիվ տվյալների փաստով:

Ինչպես հայտնում է ֆոտոլրագրող Գագիկ Շամշյանը, ըստ այդ տվյալների, ՀՀ Արդարադատության նախարարության քրեակատարողական բժշկական կենտրոնի «Դատապարտյալների հիվանդանոցի» (ժողովրդին հայտնի՝ ՑԲ) թերապևտիկ բաժանմունքի պետ Աննա Դ.-ն, դատապարտյալներից մեկի հետ կասկածելի կապի մեջ է և նա դատապարտյալ Արկադի Պ.-ն է, ում համար թերապևտիկ բաժանմունքի պետը որոշակի արտոնյալ պայմաններ է ստեղծել քրեակատարողական հիմնարկում:

Օպերատիվ տվյալներով Արկադի Պ.-ն՝ հանդիսանալով հոգեբուժական բաժանմունքի հիվանդ, թերապևտիկ բաժանմունքի միջնորդությամբ, առանց համապատասխան հիվանդությունների առկայության, տևական ժամանակ ստացիոնար բուժում է ստացել քրեակատարողական հիմնարկի թերապևտիկ բաժանմունքում:

Օպերատիվ տեղեկություններ են ստացվել նաև, որ իր համար արտոնյալ պայմանները պահպանելու համար, Արկադի Պ.-ն Աննա Դ.-ի և նրա հարազատների հանգիստն ու ժամանցը 2020 թվականի սեպտեմբեր-հոկտեմբեր ամիսներին պարբերաբար կազմակերպել է Տավուշի մարզի «Ապագա Ռեզորթ» և «Դիլիջան Ռեզորթ» հանգստյան գոտիներում:

Գ. Շամշյանի տեղեկություններով, Արկադի Պ.-ն հանցագործ աշխարհում հայտնի է «Կադո» մականվամբ:

Նշված օպերացիան իրականացվել է ՀՀ Ազգային անվտանգության ծառայության և ՀՀ Արդարադատության նախարարության հետ համատեղ։

Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: