Իսրայելն ու Կոսովոն առցանց միջացառման ընթացքում դիվանագիտական հարաբերություններ են հաստատել՝ ԱՄՆ միջնորդությամբ կնքված գործարքի շրջանակներում, հայտնում է AP-ն:

Իսրայելը Կոսովոյի հետ իր նոր կապերը դիտարկում է որպես արաբական եւ մահմեդական երկրների հետ հարաբերությունների առավել նորմալացման մի մաս, համաձայն ԱՄՆ նախկին նախագահ Դոնալդ Թրամփի նախաձեռնած համաձայնագրերի:

Zoom-ի միջոցով անցկացված ստորագրման արարողության ժամանակ Իսրայելի արտաքին գործերի նախարար Գաբի Աշկենազին ասել է, որ նոր կապերը «պատմական» են եւ «արտացոլում են փոփոխությունները տարածաշրջանում, ինչպես նաեւ արաբական եւ մահմեդական աշխարհի հարաբերությունները Իսրայելի հետ»:

Աշկենազին ասել է, որ Կոսովոյից Երուսաղեմում դեսպանություն բացելու պաշտոնական խնդրանք է ստացել, որը իսրայելական իշխանությունները հույս ունեն, որ կբացվի մարտի վերջին:

Արարողությունը ներառել է հուշատախտակի բացում, որը տեղադրվելու է Երուսաղեմում Կոսովոյի դեսպանատան մուտքի մոտ, հայտնում է Իսրայելի ԱԳՆ-ն:

Կոսովոյի արտաքին գործերի նախարար Մելիսա Հարադինայ-Ստուբլան ասել է, որ Կոսովոն եւ Իսրայելը կապված են «պատմական կապերով», եւ երկուսն էլ «պետություն դառնալու երկար եւ դժվարին ճանապարհի ականատես են դարձել»: