Այս պատգամավորները այլևս բացի սեփական անձից պարզապես ոչ մեկի չեն ներկայացնում, ոչ մեկի, որովհետև նրանք դուրս են եկել այն տրամաբանությունից, որով ձևավորվել էր նրանց մանդատը։ Այս մասին իր ֆեյսբուքյան էջում գրել է «Իմ քայլը» խմբակցության պատգամավոր Մարիա Կարապետյանը` անդրադառնալով խմբակցությունից դուրս եկած պատգամավորներին:

«Կառավարող ուժի խորհրդարանական ֆրակցիայից դուրս եկած պատգամավորների մոտ պետք է ցրվի այն միֆը, որ իրենք քաղաքական իմաստով մանդատ ունեն և կարող են որևէ իմաստալից խորհրդարանական գործունեություն ծավալել բացի մերթընդմերթ քվեարկությունների տախտակը գունավորելուց և բոցաշունչ ելույթներ ունենալուց։

Իմաստալից խորհրդարանական գործունեության առումով․ մանդատներ տրվում են կամ կառավարող ուժի նախընտրական ծրագիրը իրագործելու կամ ընդդիմադիր ուժի նախընտրական ծրագիրը որպես այլընտրանք ներկայացնելու համար։ Ի՞նչ ծրագիր են իրագործում կամ փորձում ներկայացնել որպես այլընտրանք այս պատգամավորները։ Սա վերջիվերջո «սովետների սազիվը» չէ, որտեղ մարդիկ հավաքվում են կարծիք արտահայտելու։

Լավ կլինի՝ այս ամենը հասկանան և առհասարակ մանդատներից հրաժարվեն, որովհետև օգտակար գործեր կարելի է անել նաև որպես քաղաքացի»։