Շիրակի մարզպետի տեղակալ Վարդան Գրիգորյանը ՀՀ վարչապետ Նիկոլ Փաշինյանին աշխատանքիզ ազատման դիմում է ներկայացրել հետևյալ բովանդակությամբ.

«Մեծարգո պարոն վարչապետ.

Հաշվի առնելով ազգային պետության մասին ունեցած իմ գաղափարների անհամատեղելիությունը գոյություն ունեցող իրավիճակին և առաջիկայում հույս չունենալով փոփոխությունների այդ ուղղությամբ, խնդրում եմ ինձ ազատել ՀՀ Շիրակի մարզպետի տեղակալի պաշտոնից 2020 թվականի դեկտեմբերի 1-ից»:

Գրիգորյանը դիմումին կից Ֆեյսբուքի իր էջում նաև գրել է.

«Հարգելի ընկերներ ու գործընկերներ։ Հաշվի առնելով երկրում ստեղված աղետալի ու օրհասական վիճակը, գիտակցելով որ ազգի, ազգային պետության կայացման գերնպատակը վեր է անհատական, խմբակային, քաղաքական և այլ նմանատիպ շահերից, որոշում եմ կայացրել հրաժարվել մարզպետի տեղակալի(փոխմարզպետի) իմ պաշտոնից։

Այս պաշտոնը պետականաշինության, ռեֆորմների, քաղաքական որոշումների կայացման որևէ լծակ իր մեջ չի պարունակում, միաժամանակ կաշկանդելով իմ գաղափարական, քաղաքացիական ազատ գործունեությունը։

Հասկանում եմ, որ նախկին ու ներկա, սև ու սպիտակ, կուսակցական ու կլանային բաժանումները մշտապես մասնատելով, պառակտելով ազգային ամբողջականությունը, չեն լուծել և չեն էլ կարող լուծել մեր առջև ծառացած խնդիրները, այդ իսկ պատճառով այժմ իմ ողջ կարողությունները ներդնելու եմ ազգային ինքնության և դրա հիմք հանդիսացող ազգային արժեհամակարգի վրա հիմնված նոր պետականության կերտման աշխատանքներին։

Միաժամանակ շնորհակալություն եմ հայտնում բոլոր իմ գործընկերներին, ովքեր այս ընթացքում վստահել էին ինձ ու որոնց հետ աշխատել եմ՝ փորձելով օգտակար լինել Հայաստանի Հանրապետությանը։

Իրավիճակը ստիպում է մեզ գնալ արմատական փոփոխությունների, փոխմարզպետի պաշտոնից հրաժարումը ոչ թե պատասխանատվությունից խուսափելու ձև է, այլ ընդհակառակը՝ պատասխանատվություն ստանձնելու և ստեղված իրավիճակից հաղթական ելքեր ու քայլեր գտնելու այլընտրանք չունեցող միջոց։

Աստված մեզ օգնական, ամեն ինչ դեռ առջևում է»։