Ադրբեջանի երկնքում արված արբանյակային լուսանկարները հաստատում են, որ անդրկովկասյան երկրում «գրեթե հաստատ Թուրքիային պատկանող» վեց F-16 կործանիչ կա, գրում է The Drive պորտալը։

Տիեզերքից նկարահանման ոլորտում մասնագիտացված Maxar Technologies ընկերությունը Գաբալայի օդանավակայանում թուրքական բազմաթիրախային մարտական ինքնաթիռներ է ֆիքսել։ Մինչդեռ ավելի վաղ տեղեկություններ կային, որ Թուրքիայի զինված ուժերին պատկանող F-16 ինքնաթիռները Լեռնային Ղարաբաղի մոտակա մերձճակատային հատվածում՝ Գյանջայի ավիաբազայում են պահվել, սակայն ռազմական օբյեկտների վրա հայկական ուժերի հրթիռային հարվածներից հետո դրանք տեղափոխվել են Գաբալա։

«Գրեթե հաստատ Թուրքիան է այս ինքնաթիռների օպերատորը։ Թուրքիայի ռազմաօդային ուժերն առաջին անգամ ադրբեջանական Գյանջաի օդանավակայան 6 F-16 ինքնաթիռ հուլիսի 21-ին են ուղարկել՝ իբր թուրքական և ադրբեջանական համատեղ զորավարժություններին մասնակցելու համար։ Գյանջան Գաբալայից առնվազն 120 կմ հեռավորության վրա է գտնվում»,- նշում է հրատարակությունը։

Հիշեցնենք, որ սեպտեմբերի 27-ին Ադրբեջանի զինուժը լայնածավալ հարձակում է սկսել Արցախում՝ թիրախավորելով նաև խաղաղ բնակչությանը։

Հոկտեմբերի 26-ի դրությամբ Արցախի զինուժը խոցել է հակառակորդի՝ 16 ուղղաթիռ, 24 ինքնաթիռ, 220 անօդաչու թռչող սարք, 600 միավոր զրահատեխնիկա, հիմնականում տանկեր, 86 ավտոտրանսպորտ, 10 զրահափոխադրիչ, 6 «ՏՕՍ-1Ա» ծանր հրանետային համակարգ, 4 «Սմերչ» և 1 «Ուրագան» տիպի համազարկային կրակի ռեակտիվ կայանքներ:

Հակառակորդն ունի ավելի քան 6674 զոհ։ Հայկական կողմից, նախնական տվյալներով, կա 974 զոհ։ Ադրբեջանի զինված ուժերը թիրախավորել է նաև Արցախի և Հայաստանի Հանրապետության զինվորական և քաղաքացիական ենթակառուցվածքները, որի հետևանքով Գեղարքունիքում զոհվել է 2 քաղաքացիական անձ, Արցախում զոհվել է 40 քաղաքացիական անձ, վիրավորվել է 120 քաղաքացիական անձ, նախնական տվյալներով՝ լրջորեն վնասվել է ավելի քան 6700 մասնավոր սեփականության անշարժ գույք, ավելի քան 640 մեքենա, շուրջ 1110 ենթակառուցվածքային, հանրային և արտադրական նշանակության օբյեկտներ:

Ադրբեջանական զինուժի հրետակոծության հետևանքով վիրավորվել են ինչպես արտասահմանյան, այնպես էլ տեղական լրատվամիջոցների լրագրողներ։

Հայաստանում և Արցախում սեպտեմբերի 27-ին հայտարարվել է ռազմական դրություն։
Արդեն երեք անգամ հայտարարվել է մարդասիրական հրադադարի մասին, սակայն ադրբեջանական զինուժը խախտել է այն։