ՌԴ Դաշնության խորհրդի նախագահ Վալենտինա Մատվիենկոն հեռախոսազրույցներ է ունեցել Ադրբեջանի խորհրդարանի (Միլի Մեջլիս) և Հայաստանի Ազգային ժողովի ղեկավարներ Սահիբա Գաֆարովայի և Արարատ Միրզոյանի հետ. նա կողմերին կոչ է արել խստորեն հետևել Մոսկվայում ձեռք բերված պայմանավորվածություններին ղարաբաղյան հակամարտության գոտում հրադադարի մասին: Այս մասին հաղորդում է ТАСС գործակալությունը՝ հղում անելով ռուսական խորհրդարանի վերին պալատի մամլո ծառայությանը:

«Կողմերը քննարկել են տարածաշրջանում տիրող իրավիճակը: Դաշնության խորհրդի նախագահը դիմել է զրուցակիցներին՝ կոչ անելով հակամարտության կողմերին խստորեն հետևել Մոսկվայում Ադրբեջանի, Հայաստանի և Ռուսաստանի արտգործնախարարների եռակողմ հանդիպմանը ձեռք բերված պայմանավորվածություններին հրադադարի մասին»,- ասվում է հաղորդագրության մեջ:

Հիշեցնենք, որ սեպտեմբերի 27-ին Ադրբեջանի զինուժը լայնածավալ հարձակում է սկսել Արցախում՝ թիրախավորելով նաև խաղաղ բնակչությանը։

Հոկտեմբերի 11-ի դրությամբ Արցախի զինուժը խոցել է հակառակորդի՝ 16 ուղղաթիռ, 17 ինքնաթիռ, 165 անօդաչու թռչող սարք, 510 միավոր զրահատեխնիկա, հիմնականում տանկեր, 86 ավտոտրանսպորտ, 10 զրահափոխադրիչ, 4 «ՏՕՍ-1Ա» ծանր հրանետային համակարգ, 4 «Սմերչ» և 1 «Ուրագան» տիպի համազարկային կրակի ռեակտիվ կայանքներ:

Հակառակորդն ունի ավելի քան 4719 զոհ։ Հայկական կողմից, նախնական տվյալներով, կա 429 զոհ։ Ադրբեջանի զինված ուժերը թիրախավորել է նաև Արցախի և Հայաստանի Հանրապետության զինվորական և քաղաքացիական ենթակառուցվածքները, որի հետևանքով Գեղարքունիքում սպանվել է 2 քաղաքացիական անձ, Արցախում սպանվել է 25 քաղաքացիական անձ, վիրավորվել է 102 քաղաքացիական անձ, վնասվել՝ մոտ 5800 գույք ու ենթակառուցվածք։

Ադրբեջանական զինուժի հրետակոծության հետևանքով վիրավորվել են ինչպես արտասահմանյան, այնպես էլ տեղական լրատվամիջոցների լրագրողներ։ Հայաստանում և Արցախում սեպտեմբերի 27-ին հայտարարվել է ռազմական դրություն։

Հոկտեմբերի 10-ի ժամը 12:00-ից ուժի մեջ է մտել հրադադարը, սակայն ադրբեջանական զինուժը հրադադարից հետո դիվերսիոն գործողություն է իրականացրել, նաև հրթիռակոծել խաղաղ բնակավայրեր Արցախում։