Արցախի ռուսական համայնքը դիմում է ներկայացրել ՌԴ նախագահ Վլադիմիր Պուտինին՝ խնդրելով  «անհապաղ կանգնեցնել սարսափելի պատերազմը, որն Արցախի դեմ սկսել է Ադրբեջանը»:

Ուղերձում, մասնավորապես, ասվում է.

«Հարգարժան Վլադիմիր Վլադիմիրի,

Ես՝ Գալինա Սոմովաս՝ որպես Լեռնային Ղարաբաղի Հանրապետության (Արցախ) ռուսական համայնքի ղեկավար, դիմում եմ Ձեզ ինչպես իմ անունից, այնպես էլ շատ հայրենակիցներիս, որոնք այս հողում ապրելու խոր արմատներ ունեն (որդիներ եմ մեծացրել, դաստիարակում եմ թոռներիս): Խնդրում եմ Ձեզ անհապաղ կանգնեցնել այս սարսափելի պատերազմը, որը նենգորեն մեր դեմ է սկսել Ադրբեջանը՝ սեպտեմբերի 27-ին:

Ավելին, չնայած Մոսկվայում հոկտեմբերի 9-ին հրադադարի մասին համաձայնագիր ստորագրելուն՝ Ադրբեջանը շարունակում է անդադար ռազմական գործողությունները ոչ միայն շփման գծում, այլև անօդաչուներով թիրախավորված ռմբակոծություններ է իրականացանում Ստեփանակերտի, Շուշիի և այլ հայկական գյուղերի բնակելի թաղամասերի, դպրոցների, մանկապարտեզների, եկեղեցիների և կենսական նշանակության այլ կառույցների դեմ՝ օգտագործելով կասետային ռումբեր:

Այսօր ռուսական համայնքում մենք 1500 բնակիչ ենք: Կարող էր լինել շատ ավելին, եթե ԽՍՀՄ փլուզումը չլիներ: Այն ժամանակ շատերը մեկնեցին Ռուսաստան՝ աշխատանք որոնելու, որպեսզի պահեն հայրենիքում՝ Արցախում, մնացած ընտանիքներին: Այսօր, երբ ոչ միայն Արցախը, այլև ողջ Հայաստանն է շրջափակման մեջ գտնվում, երբ ահաբեկիչ գրոհայինները գլխատում են խաղաղ բնակիչներին և այրում նրանց տները, վտանգի տակ է գտնվում ոչ միայն Արցախը, այլև՝ Կովկասը:

Այս սարսափելի վտանգն ուղղված է նաև այստեղ ապրող ռուսների դեմ: Մենք չենք պատրաստվում թողնել մեր հայրենի օջախները, փախչել՝ թողնելով հարազատներին և հայ ընկերներին մեն մենակ թշնամու դեմ, որը չի խղճում ո՛չ ծերերին, ո՛չ երեխաներին:

Վստահ եմ՝ Դուք լավ գիտեք, ինչը հայտնի է նաև ողջ աշխարհին (բացի Ալիևից և Էրդողանից), որ Ղարաբաղը հնագույն ժամանակներից հայկական հող է:

Հարգարժան, Վլադիմիր Վլադիմիրի, մենք՝ Արցախում ապրող ռուսներս, որ այս հողը նաև մեր հայրենիքն ենք համարում, չենք հավատում ադրբեջանցի նախագահի կեղծ խոսքերին, որը միջազգային հանրությանը վստահեցնում է Ադրբեջանի կազմում Արցախի ինքնավարության մասին: Մենք վախենալու բան ունենք: Շուշիում 20 հազար հայերի կոտորածը 1920 թվականին, 1988թ.-ին Սումգայիթում, այնուհետև Բաքվում, Կիրովաբադում,  և այլ ողբերգություններ ենք արդեն վերապրել հայերի հետ միասին, չէ որ ռուսներին նույնպես վտարում և սպանում էին:

Գիտեմ, որ ռուս զինվորականները վերջերս ոչնչացրել են Ադրբեջանի համար կռվող ահաբեկիչների վերապատրաստման կենտրոնը Սիրիայում: Սակայն ահաբեկիչներն արդեն կռվում են Ղարաբաղում: Նրանց պետք է ոչնչացնել Ադրբեջանում, քանի որ դա ուղիղ վտանգ է ուղղված Ռուսաստանին: Արցախն այսօր դիմակայում է այդ սարսափելի վտանգին:

Հարգարժան Վլադիմիր Վլադիմիրի, թույլ մի տվեք Ադրբեջանին և Թուրքիային իրագործել իրենց սև գործը՝ Ցեղասպանությունը, բնաջնջել մեզ՝ Արցախի քրիստոնյաներին:

Հույս ունեմ, որ նամակս կընդունեք որպես SOS ազդանշան»:

Հիշեցնենք, որ սեպտեմբերի 27-ին Ադրբեջանի զինուժը լայնածավալ հարձակում է սկսել Արցախում՝ թիրախավորելով նաև խաղաղ բնակչությանը։

Հոկտեմբերի 11-ի դրությամբ Արցախի զինուժը խոցել է հակառակորդի՝ 16 ուղղաթիռ, 17 ինքնաթիռ, 165 անօդաչու թռչող սարք, 510 միավոր զրահատեխնիկա, հիմնականում տանկեր, 86 ավտոտրանսպորտ, 10 զրահափոխադրիչ, 4 «ՏՕՍ-1Ա» ծանր հրանետային համակարգ, 4 «Սմերչ» և 1 «Ուրագան» տիպի համազարկային կրակի ռեակտիվ կայանքներ:

Հակառակորդն ունի ավելի քան 4719 զոհ։ Հայկական կողմից, նախնական տվյալներով, կա 429 զոհ։ Ադրբեջանի զինված ուժերը թիրախավորել է նաև Արցախի և Հայաստանի Հանրապետության զինվորական և քաղաքացիական ենթակառուցվածքները, որի հետևանքով Գեղարքունիքում սպանվել է 2 քաղաքացիական անձ, Արցախում սպանվել է 25 քաղաքացիական անձ, վիրավորվել է 102 քաղաքացիական անձ, վնասվել՝ մոտ 5800 գույք ու ենթակառուցվածք։

Ադրբեջանական զինուժի հրետակոծության հետևանքով վիրավորվել են ինչպես արտասահմանյան, այնպես էլ տեղական լրատվամիջոցների լրագրողներ։ Հայաստանում և Արցախում սեպտեմբերի 27-ին հայտարարվել է ռազմական դրություն։

Հոկտեմբերի 10-ի ժամը 12:00-ից ուժի մեջ է մտել հրադադարը, սակայն ադրբեջանական զինուժը հրադադարից հետո դիվերսիոն գործողություն է իրականացրել, նաև հրթիռակոծել խաղաղ բնակավայրեր Արցախում։