Ռուսաստանի հայերի միության նախագահ Արա Աբրահամյանը նամակ է ուղղել ՅՈւՆԵՍԿՕ-ի տնօրեն Օդրի Ազուլային՝ կոչ անելով ազդել Մեհրիբան Ալիևայի վրա, որը ՅՈւՆԵՍԿՕ-ի բարի կամքի դեսպան է:

Նամակում, մասնավորապես, ասվում է.

«Հարգելի տիկին գլխավոր տնօրեն,

Արտակարգ հանգամանքները ստիպում են դիմել Ձեզ՝ ՅՈւՆԵՍԿՕ եզակի միջազգային կազմակերպության ղեկավարին, որը կոչված է բոլոր մարդասիրական միջոցներով ամրապնդելու խաղաղությունը մարդկանց մտքերում և գործերում:

Լինելով ՅՈւՆԵՍԿՕ-ի բարի կամքի դեսպան՝ քաղաքակրթությունների միջև երկխոսության հարցով, խորապես կիսելով կազմակերպության սկզբունքները, որոնք 75 տարի առաջ են հիմնադրվել, ինչպես նաև ծագումով հայ լինելով՝ խնդրում եմ Ձեզ միավորել Ձեր ձայնը բոլոր նրանց ձայներին, որոնք հույս են հայտնել Լեռնային Ղարաբաղի հակամարտության՝ խաղաղ ճանապարհով շուտափույթ կարգավորման համար:

Դուք, ինչպես և ժամանակակից աշխարհի առաջատար քաղաքական գործիչներից շատերը, հասկանում եք, որ առանց խաղաղ բանակցությունների խաղաղության վերականգնում տեղի չի ունենա: ԵԱՀԿ Մինսկի խմբի համանախագահ երկրների համատեղ հայտարարությամբ կոչ է արվել Հայաստանի և Ադրբեջանի ղեկավարություններին անհապաղ դադարեցնել մարտական գործողությունները և վերսկսել բանակցությունները: Ցավոք, Բաքուն այդ կոչը չի լսել:

Ձեր անձնական միջամտության անհրաժեշտությունը պայմանավորված է այն հանգամանքով, որ այսօր վտանգի տակ է գտնվում ոչ միայն մարդկային կյանքը, այլև բազմաթիվ քրիստոնեական հուշարձանների ճակատագիրը, որոնցով դարեր շարունակ հայտնի է եղել ղարաբաղյան հողը: Եվ այդ սպառնալիքը գալիս է ոչ միայն Ադրբեջանից, այլև նրա կողմից կռվող վարձկան ջիհադականներից, որոնց ձեռագիրը ողջ աշխարհը տեսե է:

Այս առնչությամբ խնդրում եմ Ձեզ կոչ անել ձեր գործընկեր, տիկին Մեհրիբան Ալիևային՝ հանդես գալու որպես ՅՈւՆԵՍԿՕ-ի բարի կամքի դեսպան նրանց կողքին, որոնք կյանքի իմաստը պատերազմի մեջ չեն տեսնում, այլ խաղաղության:

Տիկին գլխավոր տնօրեն, իմ խորին հարգանքն եմ հայտնում և հույս ունեմ, որ բարի կամքի տեր բոլոր անձանց համատեղ ջանքերը կհաղթեն հանուն խաղաղության և կյանքի մեր բազմաչարչար 21-րդ դարում»:

Հիշեցնենք, որ սեպտեմբերի 27-ին Ադրբեջանի զինուժը լայնածավալ հարձակում է սկսել Արցախում՝ թիրախավորելով նաև խաղաղ բնակչությանը։

Հոկտեմբերի 11-ի դրությամբ Արցախի զինուժը խոցել է հակառակորդի՝ 16 ուղղաթիռ, 17 ինքնաթիռ, 165 անօդաչու թռչող սարք, 510 միավոր զրահատեխնիկա, հիմնականում տանկեր, 86 ավտոտրանսպորտ, 10 զրահափոխադրիչ, 4 «ՏՕՍ-1Ա» ծանր հրանետային համակարգ, 4 «Սմերչ» և 1 «Ուրագան» տիպի համազարկային կրակի ռեակտիվ կայանքներ:

Հակառակորդն ունի ավելի քան 4719 զոհ։ Հայկական կողմից, նախնական տվյալներով, կա 480 զոհ։ Ադրբեջանի զինված ուժերը թիրախավորել է նաև Արցախի և Հայաստանի Հանրապետության զինվորական և քաղաքացիական ենթակառուցվածքները, որի հետևանքով Գեղարքունիքում սպանվել է 2 քաղաքացիական անձ, Արցախում սպանվել է 25 քաղաքացիական անձ, վիրավորվել է 102 քաղաքացիական անձ, վնասվել՝ մոտ 5800 գույք ու ենթակառուցվածք։

Ադրբեջանական զինուժի հրետակոծության հետևանքով վիրավորվել են ինչպես արտասահմանյան, այնպես էլ տեղական լրատվամիջոցների լրագրողներ։
Հայաստանում և Արցախում սեպտեմբերի 27-ին հայտարարվել է ռազմական դրություն։

Հոկտեմբերի 10-ի ժամը 12:00-ից ուժի մեջ է մտել հրադադարը, սակայն ադրբեջանական զինուժը հրադադարից հետո դիվերսիոն գործողություն է իրականացրել, նաև հրթիռակոծել խաղաղ բնակավայրեր Արցախում։