Ռուսաստանի ԼԴ կուսակցության առաջնորդ Վլադիմիր Ժիրինովսկին ներկայացրել է Լեռնային Ղարաբաղի հակամարտության կարգավորման իր տարբերակը՝ հայտարարելով, որ անհնար է այն կարգավորել առանց ռուսական ներկայության։

«Եկեք բարեկամություն անենք, պատերազմ ոչ մեկին էլ պետք չէ։ Սակայն, Հարավային Կովկասում լուծումը մեկն է` Ռուսաստանի ներկայությունը։ Եթե այնտեղ լինի Թուրքիան, ապա հայերի համար վատ կլինի։ Եթե այլ մեկն օգնության գա հայերին այնտեղ, ռուսներից բացի, ապա Ադրբեջանի համար վատ կլինի։ Պետք է չեզոք կողմ, իսկ դա ռուսներն են»,- Telegram-ի իր ալիքում գրել է Ժիրինովսկին։

Նա նշել է, որ եթե արմատապես լուծվի հակամարտությունը, ապա դա հնարավոր կլինի միայն այն դեպքում, երբ Հայաստանն ու Ադրբեջանը մտնեն Ռուսաստանի կազմ կամ էլ Մոսկվայից կառավարում հաստատվի ԼՂ-ում, որը կարող է լինել կամ ռազմական բազայի տեսքով, կամ քաղաքացիական կառավարման։ Մեկ այլ տարբերակով, Ղարաբաղը բոլորից անկախ կլինի, բայց այնտեղ կլինի ռուսական ռազմական հավաքակազմ, եւ ոչ մեկը չի համարձակվի հարձակվել եւ պահանջել, որ Ղարաբաղը որեւէ մեկին միանա։